شوہر کے پیسوں سے افسر بننے والی لڑکی نے شوہر کو ہی چھوڑ دیا

(ویب ڈیسک) بے وفائی کا تعلق نہ تو  صنف سے ہوتا ہے اور نہ ہی کسی صورتحال سے بلکہ یہ کسی کا بھی ذاتی عمل ہوتا ہے جس کا ذمہ دار وہ شخص خود ہوتا ہے ، ایسا ہی ایک واقعہ ہمسائیہ ملک بھارت سے سامنے آیا ہے جہاں خاتون نے شوہر کے پیسوں پر پڑھ لکھ کر اعلیٰ عہدہ حاصل کیا اور پھر اسے ہی چھوڑ دیا۔ 

بھارتی اخبار ’ٹائمز آف انڈیا‘ کے مطابق بھارتی ریاست اترکھنڈ کے شہر الٰہ آباد (پراگ راج) سے تعلق رکھنے والی جیوتی موریا نے سب ڈویژنل مجسٹریٹ (ایس ڈی ایم) بننے کے بعد دوسرے شخص سے تعلقات استوار کرکے شوہر کو چھوڑ دیا، خاتون کی جانب سے اعلیٰ عہدے پر فائز ہونے کے بعد دوسرے شخص سے محبت ہوجانے اور پھر اس کی خاطر شوہر کو چھوڑے جانے پر بھارت میں مذکورہ معاملے پر گانے بھی بنانا شروع کردیے گئے۔

رپورٹ میں بتایا گیا کہ خاتون کو شوہر نے خرچہ کرکے پڑھا لکھا کر افسر بنانے میں مدد کی اور ابتدائی طور پر خاتون شوہر اور گھر کے ساتھ مخلص بھی تھیں، تاہم بعد ازاں خاتون کے ناجائز تعلقات کا انکشاف ہونے پر خاتون نے شوہر کو ہی چھوڑ دیا،رپورٹ میں بتایا گیا کہ خاتون کے شوہر خاکروب تھے اور انہوں نے اہلیہ کو مشکل حالات کے باوجود پڑھایا لکھایا۔

SDM ज्योति मौर्या के मामले में आया नया मोड़, योगी के पास पहुंचा मामला, अब उतर जाएगी आशिक़ी !@SachTakNo1#SDMjyotimaurya #jyotimaurya #jyotimauryasdm #Sachtaknews pic.twitter.com/iwNHzxIkII

— SACH TAK NEWS (@SachTakNo1) July 5, 2023

خاتون نے پڑھ لکھ کر ریاستی پبلک سروس کمیشن کا امتحان دیا، جس میں انہوں نے ریاست بھر میں تیسری پوزیشن حاصل کی اور ایڈمنسٹریشن کے اعلیٰ عہدے پر فائز ہوئیں۔

اسی حوالے سے ’زی نیوز‘ نے بتایا کہ جوڑے کے شادی 2010 میں ہوئی تھی اور ان کے ہاں 2015 میں جڑواں بیٹیوں کی پیدائش بھی ہوئی تھی، جس کے بعد خاتون جب ایس ڈی ایم بنیں تو پورے خاندان میں خوشیاں پھیل گئیں لیکن جلد ہی خاندان بکھر گیا۔

رپورٹ میں بتایا گیا کہ خاتون کے شوہر نے الزام عائد کیا کہ ان کی اہلیہ کے الٰہ آباد کے شہر میں ہی ہوم گارڈ کے ایک افسر سے ناجائز تعلقات تھے اور دونوں کا کافی عرصے سے فیس بک پر رابطہ تھا۔

خاتون کے شوہر الوک موریا کے مطابق وہ کئی سال تک بیوی اور مذکورہ شخص کی بات چیت کو پیشہ ورانہ بات چیت سمجھ کر نظر انداز کرتے رہے لیکن ایک دن ان کی بیوی کے فون میں ان کا فیس بک کھلا رہ گیا تو انہوں نے ان کے میسنجر میں جاکر نازیبا پیغامات دیکھے۔

شوہر کے مطابق بیوی کے ناجائز تعلقات کا علم ہونے پر بیوی ان پر آگ بگولہ ہوگئیں اور انہیں جیل بھجوانے کی دھمکی دی اور بعد ازاں بیوی نے ان پر جہیز خوری کا الزام لگا کر انہیں پھنسانے کی کوشش کی۔

شوہر کے مطابق انہوں نے بیوی کو مشکل حالات میں پڑھا لکھا کر بڑے عہدے پر پہنچایا لیکن اسی خاتون نے دوسرے مرد کے لیے انہیں چھوڑا۔

شوہر نے دعویٰ کیا کہ انہوں نے بیوی کو دوسرے مرد سے تعلقات ختم کرنے کا کہا، جس پر بیوی نے طلاق لینے سمیت ان پر مقدمات بنانے کی دھمکیاں دیں۔

بعد ازاں خاتون کے شوہر نے بیوی کی مبینہ ڈائری بھی میڈیا کو پیش کی، جس میں ان کی بیوی کی مبینہ کرپشن کے ثبوت تھے، جن سے عندیہ ملتا ہے کہ خاتون نے 2019 سے 2022 تک بطور ایس ڈی ایم ماہانہ 6 لاکھ روپے کی کرپشن کی ، شوہر کی جانب سے ڈائری پیش کیے جانے پر ریاستی حکومت نے خاتون کے خلاف کرپشن کی تحقیقات بھی شروع کردی۔