ٹی 20 ورلڈکپ: محمد رضوان کا بیماری کے حوالے سے بڑا انکشاف

(ویب ڈیسک)آئی سی سی ٹی ٹوئنٹی ورلڈکپ میں پاکستان اور آسٹریلیا کے مابین ہونے والے سیمی فائنل سے قبل بیماری کے حوالے سے پاکستانی وکٹ کیپر بیٹر محمد رضوان نے کہا ہے کہ مجھے سانس لینے میں دشواری ہورہی تھی، نظر دھندلا رہی تھی، جب ہسپتال پہنچے تو سانس رک گئی تھی ، نظر کے سامنے کچھ نہ تھا۔
گزشتہ سال آئی سی سی ٹی ٹوئنٹی ورلڈکپ میں پاکستان اور آسٹریلیا کے مابین ہونے والے سیمی فائنل سے قبل پاکستانی وکٹ کیپر بیٹر محمد رضوان کو انتہائی مشکل صورتحال کا سامنا کرنا پڑا تھا۔سیمی فائنل سے قبل رضوان کو شدید سینے میں تکلیف سمیت بخار اور کھانسی کے باعث قبل ہسپتال لے جایاگیا جہاں وہ دو روز تک آئی سی یو میں زیر علاج رہے۔سیمی فائنل سے قبل طبیعت خرابی کے حوالے سے محمد رضوان اور پاکستان کرکٹ بورڈ کے میڈیکل ہیڈ ڈاکٹر نجیب اللہ سومرو نے پی سی بی کے یوٹیوب چینل پر مزیدکچھ انکشافات کیے۔
محمد رضوان نے کہا کہ مجھے سانس لینے میں دشواری ہورہی تھی، نظر دھندلا رہی تھی، جب ہسپتال پہنچے تو سانس رک گئی تھی ، نظر کے سامنے کچھ نہ تھا۔انہوں نے کہا کہ نرس نے آکر کہا تھا کہ گھبرانا نہیں، 20 منٹ اور تاخیر ہوجاتی تو نقصان ہوتا، جس کے بعد ہسپتال میں 12 سے 13 ٹیسٹ ہوئے۔محمد رضوان نے کہا کہ مجھے کہا گیا کہ ایک ہفتہ رکنا پڑے گا، میں نے کہا مجھے سیمی فائنل کھیلنا ہے ، ڈاکٹرز کا کہنا تھا کہ میچ کے دن چلے جانا لیکن میں نے کہا میچ سے قبل ٹیم کوجوائن کرنا ہے۔قومی کرکٹ ٹیم کے وکٹ کیپر کا کہنا تھا کہ میں نے دو راتیں آئی سی یو میں گزار کر فٹنس ٹیسٹ دیا جس کے بعد مزید اعتماد ملا تھا۔
دوسری جانب پی سی بی کے میڈیکل ہیڈ ڈاکٹر سومرو نے بتایا کہ جب رضوان نے اپنی کنڈیشن بتائی تو مجھے لگا کہ ہارٹ اٹیک ہواہے، اس وقت ان کی آکسیجن 70 فیصد تھی۔ڈاکٹر سومرو کے مطابق ہسپتال میں سینئر ڈاکٹر نہیں تھا، میں نے کہا کہ یہ ہائی لیول ایمرجنسی ہے، رضوان کی سانس اور کھانے کی نالی دونوں میں سوزش تھی، کافی سخت دوائی لگائی گئی جس کے لیے آئی سی سی سے اجازت لی تھی۔ڈاکٹر سومرو کا کہنا تھا کہ رضوان کے جگر ، دل اور سینے سمیت 20 ٹیسٹ ہوئے تھے جبکہ 8 میڈیکل ماہرین کی ٹیم نے محمد رضوان کا علاج کیا تھا۔پی سی بی کے میڈیکل ہیڈ کا کہنا تھا کہ مجھے یاد ہے رضوان نیند میں کہہ رہے تھے' اللہ مجھے ہمت دے سیمی فائنل کھیلنا ہے۔
خیال رہے کہ طبیعت خرابی کے باوجود ٹی ٹوئنٹی ورلڈکپ کے سیمی فائنل میں محمد رضوان نے 52 گیندوں پر 67 رنز کی دھواں دھار اننگز کھیلتے ہوئے خوب داد سمیٹی تھی۔

Mohammad Rizwan and Dr Najeebullah Soomro reveal the tale of those 30 hours before the @T20WorldCup semi-final.

Watch the full video ➡️ https://t.co/r0KlzKRg2M pic.twitter.com/dWLEMXRMQd

— Pakistan Cricket (@TheRealPCB) May 8, 2022

یہ بھی پڑھیں: " دانیہ کا میڈیکل کرایا جائے" عامر لیاقت کا مطالبہ