نگران وزیراعظم ,وزیر داخلہ اور وزیر اعلی پنجاب کا لیفٹیننٹ کرنل اور 3 جوانوں کی شہادت پر اظہار افسوس
Stay tuned with 24 News HD Android App
(24 نیوز ) نگران وزیراعظم انوارالحق کاکڑ ،نگران وزیر داخلہ سرفراز بگٹی اور نگران وزیر اعلی پنجاب محسن نقوی نے لیفٹیننٹ کرنل اور 3 جوانوں کی شہادت پر اظہار افسوس کیا اور واقعہ کی شدید مذمت کی۔
نگران وزیراعظم انوارالحق کاکڑ نے شہید ہونے والے لیفٹیننٹ کرنل محمدحسن حیدر اور دیگر جونواں کے لئے بلندی درجات کی دعا کی، انہوں نے شہداء کے اہل خانہ سے ہمدردی کا اظہار کیا اور ان کیلئے صبر جمیل کی دعا کی۔
انوارالحق کاکڑ کا کہنا تھا کہ پاک فوج کے جوانوں نے تیراہ میں وطن کی حفاظت کی خاطر جام شہادت نوش کیا، مجھ سمیت پوری قوم کو اپنے شہداء پر فخر ہے، پاکستان سے دہشتگردی کے مکمل خاتمے تک اس کے خلاف جنگ جاری رکھیں گے، ملک کے امن کے دشمنوں کے ناپاک عزائم کو کبھی کامیاب نہیں ہونے دیں گے۔
نگران وزیر داخلہ سرفراز احمد بگٹی
سرفراز احمد بگٹی نے کہا کہ شہداء کے اہلخانہ کے غم میں برابر کے شریک ہیں، سکیورٹی فورسز نے بہادری سے لڑتے ہوئے تین دہشت گردوں کو ان کے منطقی انجام تک پہنچایا، شہداء قوم کے اصل ہیرو اور وطن عزیز کی شان ہیں، پوری قوم شہداء کو سلام پیش کرتی ہے۔
نگران وزیر داخلہ نے کہا کہ سکیورٹی فورسز کی لازوال قربانیاں ناقابل فراموش ہیں اور پوری قوم دہشت گردی کے خلاف جنگ میں ان کے ساتھ کھڑی ہے۔
نگران وزیر اعلی پنجاب محسن نقوی
وزیر اعلی محسن نقوی کا فائرنگ سے شہید ہونے والے لیفٹیننٹ کرنل محمد حسن حیدر اور دیگر جوانوں کی عظیم قربانی کو خراج عقیدت پیش کرتے ہوئے کہنا تھا کہ
لیفٹیننٹ جنرل محمد حسن حیدر ،شہید نائیک خوشدل خان،نائیک رفیق خان اور لانس نائیک عبدالقادر نے شہادت کا بلندرتبہ پایا۔ انہوں بہادری کے ساتھ دہشت گردوں کو جہنم واصل کیا۔ لیفٹیننٹ کرنل محمد حسن حیدر اور دیگر شہداء کی عظیم قربانی کو سلام پیش کرتے ہیں۔
شہید لیفٹیننٹ کرنل محمد حسن حیدر اور دیگر شہداء قوم کے ہیرو ہیں جنہوں نے جرات کے ساتھ دہشت گردوں کے مذموم عزائم کو ناکام بنایا۔ہماری تمام تر ہمدردیاں شہداء کے لواحقین کے ساتھ ہیں۔شہداء کی لازوال قربانیوں کو ہمیشہ یاد رکھا جائے گا ۔دہشت گردی کے ناسور کے مکمل خاتمے کے لئے قوم یکسو ہے۔ اتحاد کی طاقت سے پاک دھرتی سے دہشت گردوں کا ناپاک بوجھ اتار پھینکیں گے۔