نا معلوم افراد کی فائرنگ۔ انسپکٹر سمیت دو افراد جاں بحق

(مانیٹرنگ ڈیسک)کراچی کے علاقے سولجر بازار میں نا معلوم افراد کی  فائرنگ سے پولیس کے انسپکٹر سمیت دو افراد جاں بحق ہوگئے۔ 

تفصیلات کے مطابق کراچی میں  فائرنگ سے دو افراد جاں بحق ہوگئے، پولیس ذرائع نے بتایا ہے کہ مرنے والوں میں جاوید بلوچ نامی شخص بھی ہے جو ایس ایچ او کلاکوٹ رہ چکا ہے، جاوید بلوچ کو پولیس نے گرفتار بھی کیا تھا، مقتول انسپکٹر کئی مرتبہ معطل اور برخاست بھی کیا جا چکا تھا، جب کہ ارشد پپو کو گرفتار کرنے والی ٹیم کی سربراہی بھی جاوید بلوچ کررہا تھا۔

  واقعے کی اطلاع ملتے ہی ایس ایس پی ایسٹ قمر رضا جسکانی اور ایس ایس پی انویسٹیگیشن الطاف حسین جائے وقوعہ پر پہنچ گئے، واقعے کے حوالے سے بات کرتے ہوئے ایس ایس پی ایسٹ قمر رضا جسکانی کا کہنا تھا کہ واقعہ 10 بج کر 20 منٹ پر پیش آیا ہے، مرنے والے دونوں افراد پیشی سے واپس آرہے تھے۔

ایس ایس پی قمر رضا نے بتایا کہ جاوید بلوچ پولیس کا برطرف انسپکٹر تھا، جاوید بلوچ کا ذکر لیاری گینگ وار کے سرغنہ عزیر بلوچ کی جے آئی ٹی میں بھی تھا، جب کہ مصدق سندھ سیکریٹریٹ کا ریٹائرڈ ملازم ہے، جائے وقوعہ سے 18 خول اور 3 گولیاں بھی ملی ہیں، شواہد اکٹھے کئے جارہے ہیں اور واقعے کے حوالے سے قریب لگے سی سی ٹی فوٹیجز سے بھی مدد لی جائے گی۔

یہ بھی پڑھیں:  پارلیمنٹ میں لڑائی ۔۔۔کیس تھانے پہنچ گیا