نادرا کا ہر جمعہ کو خواتین کو خصوصی خدمات فراہم کرنے کا اعلان

(ویب ڈیسک)نیشنل ڈیٹا بیس اینڈ رجسٹریشن اتھارٹی (نادرا) نے ہر جمعہ کے روز خواتین کو خصوصی خدمات فراہم کرنے کا اعلان کیا ہے۔

تفصیلات کے مطابق نادرا نے سماجی رابطے کی ویب سائٹ ایکس (ٹوئٹر) پر اپنے پیغام میں کہا کہ جو خواتین قومی شناختی کارڈ بنوانا چاہتی ہیں، نادرا ہر ہفتے جمعہ کے روز انہیں خصوصی خدمات مہیا کرے گا۔

 پیغام میں نادرا کا مزید کہنا ہے کہ ہمارا محنتی اسٹاف شناختی دستاویزات کی تیاری کے ہر مرحلے پر خواتین کی مدد کرے گا۔ جمعہ کے روز خواتین نادرا سینٹر پہنچیں اور ترجیحی بنیاد پر خصوصی خدمات حاصل کریں.

ان کا مزید کہنا تھا کہ ہمارا مستعد اور محنتی عملہ شناختی دستاویزات بنوانے کی کارروائی میں ہر قدم پر آپ کی معاونت کے لئے تیارہے ،بروز جمعہ اپنے قریبی نادرا رجسٹریشن سنٹر تشریف لائیں اور ترجیحی خدمات کے ساتھ اپنی رجسٹریشن کرائیں…

— NADRA (@NadraPak) December 28, 2023

 خیال رہے کہ اس سے قبل کراچی کے علاقے کلفٹن میں ڈرائیونگ لائسنس برانچ نے الگ کاؤنٹر تعمیر کرتے ہوئے خواتین کو خصوصی خدمات فراہم کرنے کا وعدہ کیا تھا, اس سے قبل نادرا نے سمندر پار پاکستانیوں کیلئے ڈیجیٹل پاور آف اٹارنی متعارف کرادی جنہیں بیرونِ ملک پاکستانی مشنز تک رسائی میں مشکلات کا سامنا تھا۔

نادرا نے رواں ماہ کے آغاز میں سمندر پار پاکستانیوں کیلئے ڈیجیٹل پاور آف اٹارنی کی سروس متعارف کروائی جس کا مقصد پاور آف اٹارنی کے حصول کو آسان بنانا تھا۔

ایسے شہری جو سمندر پار پاکستانیوں کا شناختی کارڈ (نیکوپ) کے حامل ہوں پاکستان میں آن لائن طریقہ کار کے ذریعے کسی بھی شخص کو پاور آف اٹارنی دے سکیں گے۔