عمر شریف ہسپتال سے ڈسچارج، ائیر پورٹ کیلئے روانہ

(24نیوز)عمر شریف کو آج ہسپتال سے ڈسچارج کر دیا گیا ،وہ امریکا جانے کے لئے ائیر پورٹ کی طرف روانہ ہو گئے ہیں۔

تفصیلات کے مطابق کراچی ائر پورٹ پر میڈیکل ٹیم نے عمر شریف کا طبی معائنہ مکمل کر لیا ،طبی معائنے کےبعد عمر شریف کو ائر ایمبولینس میں منتقل کر دیا گیا ائر ایمبولینس کچھ دیر بعد اڑان بھرے گی،عمر شریف کی اہلیہ زریں غزل بھی عمر شریف کے ہمراہ ہیں۔

 کراچی کے نجی اسپتال میں زیر علاج پاکستانی کامیڈین اور  اداکار عمر شریف کی طبیعت میں گزشتہ روز کی نسبت کافی بہتری آئی ہے جس بنا پر ملکی اور غیرملکی ڈاکٹروں نے انہیں ائیر ایمبولینس کے سفر کے لیے فٹ قرار دے دیا ہے۔ 

فیملی ذرائع کے مطابق غیرملکی ڈاکٹرز نے عمر شریف سے گفتگو بھی کی، عمر شریف نے اپنی صحت کے بارے میں ڈاکٹرز کو خود جوابات دیے۔ عمر شریف نے ٹیلی فون پر اپنے امریکی معالج ڈاکٹر طارق شہاب سے بھی بات چیت کی اور ڈاکٹرز کی ٹیم نے اداکار عمر شریف کو امریکا کے سفر کے لیے فٹ قرار دے دیا۔ 

ہسپتال ذرائع کا کہنا ہے کہ عمر شریف کو ایمبولینس میں  صبح 9 بجے سے 11 بجے کے درمیان کراچی ائیرپورٹ پہنچایا جائے گا جبکہ ائیر ایمبولینس کے ڈاکٹرز عمر شریف کے معائنہ کے لیے ہسپتال میں موجود ہیں۔

واضح رہے کہ ائیرایمبولینس کراچی ائیرپورٹ پر موجود ہے جس کی منگل کو دن 11 بجے کے بعد  روانگی متوقع ہے۔

 یہ بھی پڑھیں:    داتا دربار عرس پر آنیوالے 5زائرین کرنٹ لگنے سے زخمی