چپلی کباب کو ’’چپلی‘‘ کیوں کہتے ہیں؟

(24 نیوز)ویسے تو کباب کئی طرح سے بنائے جاتے ہیں لیکن چپلی کباب کو ذائقہ کے ساتھ ساتھ اپنے نام کی وجہ سے پسند کیا جاتا ہے، لیکن کیا آپ نے کبھی سوچا کہ اس کا یہ منفرد نام کیسے پڑا؟

پاکستان، افغانستان اور دیگر کئی علاقوں میں یہ کباب بے حد مقبول ہیں اور لوگ آج بھی اس نام کے پیچھے چھپی کہانی جاننا چاہتے ہیں۔

کچھ لوگوں کا خیال ہے کہ اس کا نام مصالحوں یا پکانے کے انداز سے جڑا ہےلیکن اس نام کی وجہ دراصل اس کی شکل اور روایتی اندازِ تیاری سے جڑی ہوئی ہے۔

 چپلی کباب قیمے سے تیار کیا جانے والا ایک چپٹا اور گول کباب ہے جسے مختلف مصالحوں، جڑی بوٹیوں اور بیجوں کے ساتھ تیار کیا جاتا ہے۔

اسے عام طور پر بڑے لوہے کے توے پر کم تیل میں فرائی کیا جاتا ہے، جس سے اس کے کنارے خستہ جبکہ اندر کا حصہ نرم اور رسیلا رہتا ہے۔

 یہ خاص طور پر پاکستان کے خیبر پختونخواہ اور شہر پشاور میں بے حد مقبول سٹریٹ فوڈ ہے۔

لفظ ”چپلی“ دراصل پشتو زبان کے لفظ ”چپرخ“ یا ”چپدلی“ سے نکلا ہے، جس کا مطلب ہے ”چپٹا“ یا ”دبایا ہوا“۔ چونکہ اس کباب کو ہاتھ سے دبا کر چپٹی شکل دی جاتی ہے، اسی وجہ سے اسے چپلی کباب کہا جانے لگا۔ وقت کے ساتھ یہ لفظ آسان ہو کر ”چپلی“ بن گیا اور یہی نام عام استعمال میں آ گیا۔

چپلی کباب کی جڑیں پاکستان اور افغانستان کے پہاڑی علاقوں میں پائی جاتی ہیں، خاص طور پر پشاور میں یہ ایک ثقافتی اور روایتی ڈش سمجھی جاتی ہے۔