وزیراعظم سے چیئرمین قومی احتساب بیورو کی ملاقات

(24  نیوز)وزیراعظم محمد شہباز شریف سے چیئرمین قومی احتساب بیورو لیفٹیننٹ جنرل ریٹائرڈ نذیر احمد بٹ کی ملاقات، چیئرمین نیب نے وزیراعظم کو قومی احتساب بیورو کی دو سالہ کارکردگی رپورٹ برائے  2023- 2024 پیش کی ۔

رپورٹ میں قومی احتساب بیورو کے ہیڈ کوارٹرز اور علاقائی دفاتر کی  ریکوریز اور کارکردگی کے حوالے سے  تفصیلات شامل ہیں، وزیراعظم نے ملک سے بد عنوانی کے خاتمے کے حوالے سے  قومی احتساب بیورو کے کردار کی پذیرائی کی۔ 

وزیراعظم شہباز شریف نے کہا کہ ملک سے کرپشن اور بد عنوانی کا خاتمہ حکومت کی اولین ترجیحات میں شامل ہے،کرپشن سے پاک پاکستان کے وژن کی تکمیل کے لیے نیب کو تمام ضروری سہولیات دی جائیں گی۔

شہباز شریف کے مطابق نیب مالیاتی فراڈ کے متاثرین کی مدد کرنے اور ان کی رقوم کی جلد واپسی یقینی بنانے کے لیے اقدامات لے،وزیراعظم نے نیب کے زیر التوا مقدمات کو جلد از جلد نمٹانے کی ہدایت  کی۔

چیئرمین نیب نے کہا کہ نیب نے گزشتہ دو سالوں میں اربوں روپے کی خرد برد کی گئی رقوم کی ریکوری کی،نیب نے سینکڑوں ایکڑ سرکاری اراضی غیر قانونی قبضے سے بازیاب کرائی جس کی مالیت اربوں روپے ہے۔

 2023-2024 کے دوران نیب نے 700 انکوائریاں مکمل کیں اور 218 تحقیقات مکمل کیں جبکہ 21 نئے ریفرنس دائر کیے، ملاقات میں وفاقی وزیر برائے قانون و انصاف اعظم نذیر تارڑ بھی موجود تھے۔

یہ بھی پڑھیں :میرا خیال ہے کہ عمران مائنس ہی ہو گئے ہیں، علیمہ خان