تنخواہ دار ملازمین نے 3 ماہ میں کتنے ارب کا ٹیکس ادا کیا؟
Stay tuned with 24 News HD Android App
( ویب ڈیسک ) رواں مالی سال کی پہلی سہ ماہی میں تنخواہ دار ملازمین ایک سو تیس ارب روپے ٹیکس ادا کرکے پھر سرفہرست رہے۔
تفصیلات کے مطابق رواں مالی سال کی پہلی سہ ماہی میں تنخواہ دار طبقہ ایک بار پھر ٹیکس دہندگان میں سرفہرست رہا۔
ذرائع نے بتایا کہ تنخواہ دار ملازمین نے جولائی سے ستمبر کے دوران 130 ارب روپے ٹیکس ادا کیا۔ یہ رقم گزشتہ مالی سال کی اسی مدت کے مقابلے میں 20 ارب روپے زیادہ ہے۔
یہ بھی پڑھیں:سعودی عرب نے ملازمین کو بڑی خوشخبری سنادی
گزشتہ مالی سال کی پہلی سہ ماہی میں تنخواہ دار طبقے نے 110 ارب روپے کا انکم ٹیکس جمع کرایا تھا اور رواں مالی سال کے ابتدائی تین ماہ میں ملازمین نے 18 فیصد زائد ٹیکس ادا کیا جبکہ پچھلے مالی سال کے دوران اس طبقے نے مجموعی طور پر 553 ارب روپے ٹیکس جمع کرایا تھا۔
ذرائع کے مطابق رواں مالی سال جولائی تا ستمبر ریونیو شارٹ فال 200 ارب روپے سے زائد رہا، جبکہ سیلاب سے ٹیکس کی مد میں 70 ارب روپے کے نقصان کا تخمینہ لگایا گیا ہے۔
ایف بی آر کی مجموعی ریونیو کلیکشن گروتھ 12.5 فیصد تک محدود رہی، اسی دوران انکم ٹیکس کی مد میں 11 فیصد، سیلز ٹیکس میں 13 فیصد، فیڈرل ایکسائز ڈیوٹی میں 26 فیصد اور کسٹمز ڈیوٹی میں 13 فیصد اضافہ ریکارڈ کیا گیا۔