ناراض ہوں۔۔اداکارہ زارا نور نے بھی خاموشی توڑدی

(24نیوز)اداکارہ و ماڈل زارا نور عباس نے عید الفطر کے موقع پر اپنے لباس کی تصاویر شیئر کرنے والی شخصیات کے رویے سے ںاخوش ہوتے ہوئے کہا کہ اگر کوئی فلسطینیوں پر مظالم کی بات نہیں کر سکتا تو کم از کم سادگی ہی اختیار کرلے۔

اداکارہ نے اپنی انسٹاگرام اسٹوری میں کسی بھی شخصیت کا نام لئے بغیر ان شخصیات پر تنقید کی، جنہوں نے عید الفطر کے تینوں دنوں میں اپنی مختلف تصاویر شیئر کی تھیں۔زارا نور عباس نے لکھا کہ لوگ غزہ اور فلسطین پر اسرائیلی حملوں پر بات کرتے کرتے عید کے پہلے دوسرے اور تیسرے دنوں میں اپنی تصاویر شیئر کرنے لگے۔

انہوں نے تصاویر شیئر کرنے والی شخصیات پر ناراضگی کا اظہار کرتے ہوئے لکھا کہ اگر کوئی فلسطینیوں پر ہونے والے مظالم پر واقعی فکر مند ہے تو انہیں ایسا نہیں کرنا چاہیے۔انہوں نے لکھا کہ فلسطینیوں پر ہونے والے مظالم کے تناظر میں سوشل میڈیا پر خوشی کا اظہار نہیں کرنا چاہیے۔اداکارہ و ماڈل نے لوگوں کو تجویز دی کہ اگر وہ کسی مظلوم کی مدد نہیں کر سکتے، ان کے لئے بول نہیں سکتے تو کم از کم سوشل میڈیا پر خوشی کا اظہار نہ کریں۔

زارا نور عباس کی اسٹوری سے قبل عید الفطر کے موقع پر متعدد شوبز شخصیات نے عید کے تینوں دنوں کے موقع پر مختلف طرح کے لباس کے ساتھ تصاویر شیئر کی تھیں۔تاہم متعدد شوبز شخصیات نے عید سے قبل اور بعد میں بھی فلسطینیوں پر ہونے والے مظالم پر پوسٹس کرکے اسرائیلی جارحیت کی مذمت کی تھی۔زارا نور عباس کی جانب سے لوگوں کو عید کی خوشیاں نہ منانے کی پوسٹ کئے جانے پر لوگوں نے انہیں یاد دلایا کہ عید کا تعلق فلسطینیوں پر حملے سے نہیں ہے، کیوں کہ خود غزہ اور فلسطین میں بھی عید منائی گئی۔

 یہ بھی پڑھیں:اداکارسنی دیول کےپاپا کو کس بات کا افسوس ہے ۔۔۔ خبر میں جانئے