مفت بجلی ختم!افسران کو اب عام شہری کی طرح بل ملیں گے

(ویب ڈیسک)افسران کی مفت بجلی یونٹس کی سہولت ختم کر دی گئی ہے اور انہیں عام شہری کی طرح بجلی بل ملیں گے۔

نجی ٹی وی کے مطابق لاہور الیکٹرک سپلائی کمپنی (لیسکو) کے گریڈ 18 سے 20 تک کے افسران کی مفت بجلی یونٹس کی سہولت ختم کر دی گئی ہے اور اب انہیں بھی عام شہریوں کی طرح بجلی کے بل ملنا شروع ہو گئے ہیں،30 سال میں پہلی بار افسران کی آدھی تنخواہ بجلی بلوں کی نذر ہو گئی ہے۔

لیسکو ذرائع نے بتایا کہ گریڈ 18 کے افسران کو سالانہ 6 ہزار جب کہ گریڈ 19 کے افسران کو 8 ہزار بجلی یونٹس مفت ملتے تھے، ان کے علاوہ گریڈ 20 کے افسران کو سالانہ 10 ہزار مفت یونٹس کی سہولت حاصل تھی۔

ذرائع نے بتایا کہ یہ فیصلہ دیگر ڈسکوز کے گریڈ 18 سے 20 تک کے افسران کے لیے بھی کیا گیا تھا  تاہم دیگر ڈسکوز نے عدالتوں سے حکم امتناع لے کر مفت بجلی بحال کروا لی۔

یہ بھی پڑھیں:قطر سوگ میں ڈوب گیا! سابق امیر شیخ حمد بن خلیفہ الثانی انتقال کرگئے

لیسکو افسران کا کہنا ہے کہ دیگر کمپنیوں کی مفت بجلی کی سہولت بحالی غیر قانونی ہے، تنخواہ میں تمام مراعات شامل ہوتی ہیں،مفت بجلی کی سہولت ملک کے تمام اداروں سے ختم کی جائے، اس حوالے سے وزارت توانائی تمام کمپنیوں کے لیے یکساں پالیسی کا اعلان کریں۔

ذرائع نے بتایا ہے کہ لیسکو کے ایک ایس ڈی او کو مفت بجلی ختم ہونے پر جب پہلے مہینے کا بجلی کا بل ملا تو وہ بل کی رقم دیکھ کر سر پکڑ کر بیٹھ گئے اور دو دن کی چھٹی پر چلے گئے۔

مذکورہ ایس ڈی او کا گھر 10 مرلے کا ہے اور ان کا بل 72 ہزار روپے کا آیا ہے۔

اتنا زیادہ بل دیکھ کر ایس ڈی او کا کہنا ہے کہ 28 سالہ سروس میں کبھی بھی بجلی کا بل نہیں دیا۔ آج بل دیکھ کر احساس ہوا کہ بجلی واقعی مہنگی ہے۔ عوام جو بل دیتے ہوں گے، ان کا کیا حال ہوتا ہوگا۔