امریکی شرح سود میں اضافے کے خدشات، سونے کی قیمتوں میں مسلسل کمی

(ویب ڈیسک ) مضبوط امریکی معاشی اعداد و شمار اور شرح سود میں اضافے کے بڑھتے خدشات کے باعث عالمی منڈی میں سونے کی قیمتوں میں پیر کے روز بھی کمی کا سلسلہ جاری رہا، جبکہ مشرقِ وسطیٰ میں نئی کشیدگی کے باعث تیل کی قیمتوں میں نمایاں اضافہ ریکارڈ کیا گیا۔

بین الاقوامی خبر رساں ادارے کے مطابق اسپاٹ گولڈ کی قیمت 0.4 فیصد کمی کے بعد 4,313.11 ڈالر فی اونس پر آگئی، جبکہ جمعہ کے روز سونے کی قیمت تقریباً 3 فیصد گر کر مارچ کے بعد کم ترین سطح پر پہنچ گئی تھی۔

ماہرین کے مطابق امریکی معیشت میں گزشتہ ماہ 172,000 نئی ملازمتوں کے اضافے نے یہ تاثر مضبوط کیا ہے کہ امریکی مرکزی بینک (فیڈرل ریزرو) رواں سال شرح سود میں اضافہ کر سکتا ہے۔ بلند شرح سود کے خدشات کے باعث سرمایہ کار سونے سے دور ہو رہے ہیں کیونکہ سونا منافع یا سود فراہم نہیں کرتا۔

 یہ بھی پڑھیں: ایران اسرائیل کشیدگی: تیل کی قیمتوں میں بڑا اضافہ

دوسری جانب اسرائیل اور ایران کے درمیان تازہ کشیدگی کے بعد خام تیل کی قیمتوں میں 3 ڈالر فی بیرل سے زائد اضافہ ہوا، جس سے عالمی سطح پر مہنگائی کے خدشات مزید بڑھ گئے ہیں۔

مالیاتی منڈیوں کے تجزیہ کاروں کا کہنا ہے کہ اگر مہنگائی کی رفتار برقرار رہی تو فیڈرل ریزرو شرح سود بڑھانے پر مجبور ہو سکتا ہے، جس کا دباؤ سونے کی قیمتوں پر برقرار رہنے کا امکان ہے۔

قیمتی دھاتوں کی دیگر منڈیوں میں چاندی کی قیمت 0.4 فیصد کمی کے ساتھ 67.56 ڈالر فی اونس، پلاٹینم 0.5 فیصد کمی کے بعد 1,767.15 ڈالر فی اونس جبکہ پیلیڈیم 1,225.66 ڈالر فی اونس پر مستحکم رہا۔