راکٹ کی بلند ترین پرواز، کینیڈا کے طلبا نے عالمی ریکارڈ قائم کر دیا ، ویڈیو وائرل

(ویب ڈیسک)یونیورسٹی آف واٹرلو کی راکٹری ٹیم نے 2026 لانچ کینیڈا چیلنج میں اپنے تیار کردہ مائع ایندھن والے راکٹ پولارِس کو 63 ہزار 497 فٹ کی بلندی تک پہنچا کر نیا عالمی ریکارڈ قائم کر دیا ہے۔

کینیڈا کے شہر ٹمنز، اونٹاریو میں ہونے والے مقابلے کے دوران طلبا کی ٹیم نے پولارِس کو کامیابی سے لانچ کیا، راکٹ نے سابق عالمی ریکارڈ 56 ہزار 590 فٹ کو پیچھے چھوڑ دیا۔

مکینیکل انجینئرنگ کی دوسرے سال کی طالبہ اور ٹیم کی مستقبل کی ٹیکنیکل لیڈ نیوا پٹیل نے لانچ کے تجربے کو ناقابلِ فراموش قرار دیا۔

ان کے مطابق لانچ سے پہلے کے لمحات انتہائی دباؤ والے تھے، تاہم، جب راکٹ فضا میں بلند ہوا، عالمی ریکارڈ ٹوٹنے کی تصدیق ہوئی اور پیراشوٹ کھلے تو پوری ٹیم نے خوشی کا اظہار کیا۔ 
 مزید پڑھیں:امریکی ریپر میکلمور  کا بڑااقدام، فلسطین کو 10 لاکھ ڈالر عطیہ کرنیکااعلان

پولارِس 17 فٹ لمبا ہے اور مکمل ایندھن کے ساتھ اس کا وزن تقریباً 300 پاؤنڈ ہے، رواں سال راکٹ کے ڈیزائن میں انجن اور ریکوری سسٹم سمیت کئی اہم اپ گریڈ کیے گئے تھے۔

ٹیم کے مطابق انجن کی تھرسٹ میں اضافہ کیا گیا تاکہ لانچ کے ابتدائی مرحلے میں راکٹ کا استحکام بہتر ہو جبکہ اس کے مجموعی ڈیزائن کو اس طرح بہتر بنایا گیا کہ زیادہ سے زیادہ بلندی حاصل کی جا سکے۔

راکٹ کی واپسی کو یقینی بنانے کے لیے ریکوری سسٹم کو بھی مضبوط بنایا گیا اور اسے متوقع تعیناتی قوت سے تقریباً 10 گنا زیادہ قوت برداشت کرنے کے لیے انجینئر کیا گیا۔