عالمی مارکیٹ میں سونے کی قیمتوں میں اضافہ جاری

(ویب ڈیسک )عالمی منڈی میں جمعہ کو سونے کی قیمتوں میں مزید اضافہ ریکارڈ کیا گیا، جبکہ قیمتی دھات جنوری کے بعد اپنی بہترین ہفتہ وار کارکردگی کی جانب بڑھ رہی ہے، سرمایہ کار اب امریکا کی اہم نان فارم پے رولز   رپورٹ کے منتظر ہیں، جو آئندہ شرح سود کے فیصلوں پر اثر انداز ہو سکتی ہے۔

بین الاقوامی خبر رساں ادارے رائٹرز کے مطابق اسپاٹ گولڈ کی قیمت میں 0.6 فیصد اضافہ ہوا، جس کے بعد یہ 4,262.39 ڈالر فی اونس تک پہنچ گئی۔ گزشتہ روز سونا سات ہفتوں کی بلند ترین سطح پر بھی پہنچا، جبکہ ہفتہ وار بنیاد پر اس کی قیمت میں 5 فیصد سے زائد اضافہ ریکارڈ کیا گیا۔

اسی طرح امریکی گولڈ فیوچرز بھی 0.5 فیصد اضافے کے ساتھ 4,321.50 ڈالر فی اونس پر ٹریڈ کرتے رہے۔

 یہ بھی پڑھیں:پیٹرولیم مصنوعات۔۔!نئی قیمتوں کا اعلان ہو گیا

مارکیٹ تجزیہ کاروں کے مطابق مشرقِ وسطیٰ میں ممکنہ جنگ بندی کی امیدوں اور توانائی کی قیمتوں میں نسبتاً نرمی سے مہنگائی کے خدشات کم ہوئے ہیں، جس کے باعث سونے کی قیمتوں کو سہارا ملا ہے۔ دوسری جانب امریکی صدر ڈونلڈ ٹرمپ نے امید ظاہر کی ہے کہ ایران کے ساتھ جاری جنگ جلد ختم ہو سکتی ہے۔

سرمایہ کاروں کی توجہ اب امریکا کی جولائی کی نان فارم پے رولز رپورٹ پر مرکوز ہے، کیونکہ اس سے یہ اندازہ لگایا جائے گا کہ امریکی فیڈرل ریزرو آئندہ ماہ شرح سود میں اضافہ کرے گا یا نہیں۔ موجودہ اندازوں کے مطابق ستمبر میں شرح سود میں اضافے کا امکان تقریباً 55 فیصد رہ گیا ہے، جو ایک ہفتہ قبل 63 فیصد تھا۔

ادھر دیگر قیمتی دھاتوں میں بھی اضافہ دیکھا گیا۔ چاندی کی قیمت 1.3 فیصد اضافے کے ساتھ 62.27 ڈالر فی اونس، پلاٹینم 0.5 فیصد اضافے کے بعد 1,737.25 ڈالر فی اونس جبکہ پیلیڈیم معمولی کمی کے ساتھ 1,368.37 ڈالر فی اونس پر ٹریڈ کرتا رہا۔ تاہم ہفتہ وار بنیاد پر تینوں دھاتیں مجموعی طور پر اضافے کی جانب گامزن ہیں۔