پری مون سون سسٹم فعال،لاہور میں وقفے وقفے سے بارش متوقع

(24نیوز ) مغربی ہواؤں کا نیا سلسلہ 2 مئی سے ملک میں داخل ہوگا، جس کے باعث 2 سے 5 مئی کے دوران شہر میں تیز ہواؤں، آندھی اور بارش کا امکان ہے۔

ماہرین کے مطابق بارشوں کے نتیجے میں درجہ حرارت میں وقتی کمی آئے گی، تاہم 5 مئی کے بعد دوبارہ گرمی کی شدت میں اضافہ متوقع ہے۔ ڈپٹی ڈائریکٹر میٹ کا کہنا ہے کہ مئی اور جون سال کے گرم ترین مہینے ہوں گے جبکہ مئی کے آخری 10 دنوں میں درجہ حرارت 45 ڈگری سینٹی گریڈ سے تجاوز کر سکتا ہے۔

لاہور میں آج دن بھر موسم ابر آلود رہنے کا امکان ہےجبکہ دوپہر کے بعد گرج چمک اور تیز ہواؤں کے ساتھ بارش متوقع ہے۔

محکمہ موسمیات کےمطابق شہرمیں ہلکی بارش ہوسکتی ہے جبکہ تیزہواؤں کی رفتار 70 سے 90 کلومیٹر فی گھنٹہ تک پہنچنےکا امکان ہے،درجہ حرارت زیادہ سےزیادہ 35 اور کم سے کم 25 ڈگری سینٹی گریڈ رہنے کی توقع ہے۔

 یہ بھی پڑھیں:انٹرنیٹ پر بڑا خطرہ؟عالمی سطح پر ہلچل مچ گئی

ماہرین کےمطابق پری مون سون سسٹم اور مغربی ہواؤں کے باعث وقفے وقفے سے بارش کا سلسلہ جاری رہ سکتا ہے۔

اسلام آباد سمیت ملک کے بالائی علاقوں میں آج بارش کا امکان ظاہر کیا گیا ہے تاہم میدانی علاقوں میں موسم بدستور گرم اور خشک رہے گا۔

محکمہ موسمیات کے مطابق خیبر پختونخوا کے مختلف شہروں ، اسلام آباد اور خطہ پوٹھوہار میں بارش متوقع ہے۔

 اس کے علاوہ بالائی اور جنوب مشرقی پنجاب سمیت گلگت بلتستان اور کشمیر میں بھی تیز ہواؤں کے ساتھ بارش کا امکان ظاہر کیا گیا ہے جبکہ ملک کے دیگر علاقوں میں موسم گرم اور خشک رہنے کی پیشگوئی کی گئی ہے۔

گزشتہ روز سب سے زیادہ درجہ حرارت جیوانی میں 46 ڈگری سینٹی گریڈ رہا۔ موہنجو دڑو میں 44 اور لاڑکانہ میں 43 ڈگری سینٹی گریڈ ریکارڈ کیا گیا۔