اسٹیل ملزملازمین کی برطرفی،بلاول بھٹو نے بڑا اعلان کردیا

(24نیوز)پیپلز پارٹی کے چیئرمین بلاول بھٹو زرداری کا کہنا ہے کہ ہماری جماعت پاکستان اسٹیل ملز کے ہر ایک ملازم کو اُن کی ملازمت واپس دلوائے گی۔اگر ہٹانا ہی ہے تو عمران خان کو ان کے عہدے سے ہٹائیں،ملازمین کو نہیں۔

سماجی رابطے کی ویب سائٹ ٹوئٹر پر جاری کئے گئے اپنے بیان میں بلاول بھٹو زرداری نے کہا کہ بے رحم اور سفاک حکومت نے پاکستان اسٹیل ملز کے 4500 ملازمین کو اُن کی ملازمت سے برطرف کر دیا لیکن پاکستان پیپلز پارٹی تمام ملازمین کو اُن کی نوکریاں دوبارہ بحال کرائے گی۔

بے رحم حکومت نے اسٹیل ملز کے 4500 ملازمین کو برطرف کردیا، پی پی پی اسٹیل ملز کے تمام برطرف ملازمین کو بحال کرے گی، اس تاریخی صنعتی اثاثے کی اراضی کے مالک اہلیان سندھ ہیں، ہم پی ٹی آئی کو اس معاشی قتل سے فرار نہیں ہونے دینگے، ملازمین کے بجائے عمران خان کو برطرف ہونا چاہیے۔ https://t.co/0pfqqtZQY2

— BilawalBhuttoZardari (@BBhuttoZardari) November 28, 2020

بلاول بھٹو زرداری نےمزید  کہا کہ پاکستان اسٹیل کی تاریخی صنعتی زمین سندھ کے لوگوں کا اثاثہ ہے لہٰذا ہم پی ٹی آئی کو لوگوں کا معاشی قتل نہیں کرنے دیں گے۔اپنے بیان میں اُن کا مزید کہنا تھا کہ عمران خان کو وزیرِ اعظم کے عہدے سے ہٹائیں، ملازمین کو نہیں۔

واضح رہے کہ حکومت نے پاکستان اسٹیل ملز کے 4 ہزار 544 ملازمین کو برطرف کر دیا ہے۔برطرف کیئے جانے والوں میں پے گروپ 2، 3، 4 کے ملازمین، جونیئر آفیسرز، اسسٹنٹ منیجرز، ڈویژنل منیجر، ڈی سی ای، ڈی جی ایم اور منیجرز بھی شامل ہیں۔حکومت ملازمین کو فی کس اوسطاً 23 لاکھ روپے ادا کرے گی۔