وزیراعظم سےترکیہ کے صدر کا رابطہ،حالیہ سیلاب پر گہرے افسوس کا اظہار

 وزیراعظم  شہباز شریف سے جمہوریہ ترکیہ کے صدر رجب طیب ایردوان نے  ٹیلی فون پر رابطہ کیا، صدر ایردوان نے پاکستان کے مختلف حصوں میں حالیہ سیلاب پر گہرے افسوس کا اظہار کیا۔

 ترک صدر نے تباہ کن سیلاب کی وجہ سے ہونے والے قیمتی جانوں اور املاک کے نقصان پر پاکستان کے عوام کے ساتھ اپنے ملک کی یکجہتی کا اظہار کیا اور پاکستان کو کسی بھی مدد کی پیشکش کی،انہوں نے کہا کہ ترکیہ امدادی کارروائیوں کے حوالے سے ہر  ممکن مدد کے لئے تیارہے۔ 

اس مشکل وقت میں ترک صدر کے  جذبات کے ساتھ ساتھ مدد کی فراخدلانہ پیشکش پر شکریہ ادا کرتے ہوئے وزیراعظم نے کہا کہ یہ ٹیلی فون کال پاکستان اور ترکیہ کے درمیان مضبوط، گہرے اور برادرانہ تعلقات کی عکاس ہے۔ دونوں فریق ہمیشہ ایک دوسرے کے شانہ بشانہ کھڑے رہے ہیں۔

 دونوں رہنماؤں نے اس سال کے شروع میں ہونے والی اپنی بات چیت اور چین کے شہر تیانجن میں شنگھائی تعاون تنظیم کے سربراہی اجلاس کے دوران اپنی آئندہ ہونے والی ملاقات پر بھی گفتگو کی۔

یہ بھی پڑھیں :  پنجاب افسران اور ان کے اہلخانہ کیلئے علیحدہ میڈیکل سہولتوں کی فراہمی کا نوٹیفکیشن جاری