لکی مروت میں سکیورٹی فورسز کے کیمپ پر حملہ

(24 نیوز)خیبرپختونخوا کے ضلع لکی مروت میں کالج میں قائم سیکورٹی فورسز کے کیمپ پر حملہ ہوا ہے۔
پولیس ذرائع کے مطابق خیبرپختونخوا کے ضلع لکی مروت کے پوسٹ گریجویٹ کالج میں سکیورٹی فورسز کے کیمپ پر حملہ ہوا ہے، زور دار دھماکوں اور فائرنگ کا سلسلہ جاری ہے، حملے میں وسیع پیمانے پر جانی نقصان کا خدشہ ہے،دھماکے سے لوگوں میں خوف و ہراس پھیل گیا۔
ابتدائی معلومات کے مطابق گورنمنٹ پوسٹ گریجویٹ کالج لکی مروت میں فوج اور فرنٹیئر کور کی بھاری نفری موجود ہے،نامعلوم دہشتگردوں نے چھوٹے اور بڑے ہتھیاروں سے حملہ کیا،سکیورٹی فورسز کی طرف سے بھی فائرنگ اور بڑے ہتھیار استعمال کئے جا رہے ہیں، تقریبا6سے 7 زوردار دھماکے کئے گئے ہیں۔
محکمہ صحت کی جانب سے ضلع بھر کے ہسپتالوں میں ایمرجنسی نافذ کردی گئی ، ایم ایس ڈاکٹر اکبرزمان کاکہناہے کہ تمام متعلقہ سٹاف کو فوری طور پر ہسپتال پہنچنے کا حکم دیدیا گیا۔
 ضلع میں انٹیلی جنس بیسڈ آپریشن کے باعث پاک آرمی اور فرنٹیئر کور کی نفری پوسٹ گریجویٹ کالج میں کئی مہینے سے مقیم ہے۔

یہ بھی پڑھیں: سمندری؛شادی کویادگار بنانے کیلئے ملکی و غیرملکی کرنسی کی بارش، ویڈیو وائرل