وزیر داخلہ سے سری لنکن ہائی کمشنر کی ملاقات، 43 پاکستانی قیدیوں کی واپسی پر اتفاق

(24نیوز)وفاقی وزیرداخلہ محسن نقوی کی ایک اور محاذ پر کامیابی، سری لنکا  کی جیل میں بند  43 پاکستانی قیدی  وطن واپس آئیں گے۔

وفاقی وزیر داخلہ محسن نقوی سے سری لنکا کے ہائی کمشنر ایڈمرل (ر) رویندرا چندرا سری وجے گونارتنے کی ملاقات ہوئی، ملاقات میں سری لنکا میں قید 43 پاکستانی شہریوں کی فوری وطن واپسی پر اتفاق ہو گیا،سری لنکن ہائی کمشنر نے  اس سلسلے میں ہر ممکن تعاون کی یقین دہانی کرائی۔

وفاقی وزیرداخلہ نے قیدیوں کی وطن واپسی کیلئے تعاون  پر سری لنکن ہائی کمشنر کاشکریہ ادا کیا۔

وفاقی وزیرداخلہ محسن نقوی نے کہا کہ پاکستانی قیدیوں کی ملک واپسی کیلئے انتظامات کو  چند روز میں حتمی شکل دے دی جائے گی،وزارت داخلہ ان قیدیوں کو واپس لانے کیلئے گزشتہ ایک ماہ سے سری لنکن حکام کے ساتھ کام کر رہی تھی،سری لنکا اور پاکستان کے درمیان تعلقات گزشتہ 7 دہائیوں میں مضبوط سے مضبوط تر ہوتے جارہے ہیں، پاکستان باہمی تعلقات کو مختلف شعبو ں میں مزید آگے بڑھانے کا خواہاں ہے۔

ملاقات میں دونوں ممالک کے قیدیوں کی اپنے ملک واپسی کیلئے فوری اقدامات کرنے پر اتفاق کیا گیا،ملاقات میں باہمی دلچسپی کے امور اور دوطرفہ تعلقات کے فروغ  پر تبادلہ خیال کیا گیا،سکیورٹی اور انسداد منشیات کے سلسلے میں تعاون بڑھانے پر اتفاق کیا گیا،وزارت داخلہ آمد پر وفاقی وزیر داخلہ محسن نقوی نے سری لنکن ہائی کمشنر کا خیر مقدم کیا۔

وفاقی سیکرٹری داخلہ خرم علی آغا،چئیرمین نادرا لیفٹیننٹ جنرل محمد منیر افسراور متعلقہ افسران کے علاوہ سری لنکن ہائی کمشن  کے حکام بھی اس موقع پر موجود تھے۔