پاک آسٹریلیا وائٹ بال سیریز کی ٹکٹوں کی فروخت شروع،5 ٹکٹوں پر ایک مفت

(24 نیوز) پاکستان کرکٹ بورڈ نے پاکستان اور آسٹریلیا کے درمیان کھیلے جانے والی تین ون ڈے اور ایک ٹی ٹونٹی میچ کے لئے ٹکٹوں کی فروخت شروع کر دی ،پانچ ٹکٹوں پر ایک مفت ٹکٹ ملے گی،ٹکٹ کی قیمت 500 سے 3000 روپے تک مقرر کی گئی ہے، دونوں ٹیموں کے مابین واحد ٹی ٹونٹی انٹرنیشنل میچ کے ٹکٹ کی قیمت 500 سے 4000 روپے تک مقرر کی گئی ہے۔
وائٹ بال سیریز میں شامل تمام میچز کی ٹکٹیں https://pcb.bookme.pk/ پر فروخت کے لیے دستیاب ہیں، اس کے علاوہ شائقین کرکٹ چاہیں تو اپنے قریبی ایم اینڈ پی اسٹورز سے بھی ان میچز کی ٹکٹیں خرید سکتے ہیں۔اس حوالے سے ایزی پیسہ/ جاز کیش/کریڈٹ کارڈ یا این آئی ایف ٹی کے ذریعے ٹکٹ خریدے جاسکتے ہیں۔ٹکٹوں کی خرید و فروخت کے لیے ہیلپ لائن نمبر 03137786888 پربھی رابطہ کیا جاسکتا ہے۔
شائقین کرکٹ ایک شناختی کارڈ پر زیادہ سے زیادہ 6ٹکٹیں خرید سکتے ہیں تاہم ون ڈے سیریز کے کسی میچ کے پانچ ٹکٹ خریدنے پر انہیں ایک ٹکٹ مفت دیا جائے گا۔ پی سی بی کی جانب سے یہ پیشکش صرف پاکستان اور آسٹریلیا کے مابین تین ون ڈے میچز کے لیے ہی متعارف کروائی گئی ہے۔ہیڈ آف کمرشلز پاکستان کرکٹ بورڈ سلمان مسعود کا کہناہے کہ شائقین کرکٹ کی سہولت کے پیش نظرپی سی بی نے پاکستان اور آسٹریلیا کے مابین وائٹ بال سیریز کی ٹکٹوں کی قیمت کو کم رکھا ہے۔ اس کے علاوہ شائقین کرکٹ کو کار پارکنگ سے انکلوژرز تک گولف کارٹس پر مشتمل شٹل سروس کی سہولت بھی فراہم کررہے ہیں۔انہوں نے کہا کہ پی سی بی نے اسٹینڈز میں فلٹر شدہ ٹھنڈے پانی اور پنکھوں کی فراہمی سمیت اسٹیڈیم کے باہر ایک بڑی اسکرین بھی نصب کررکھی ہے جہاں شائقین کرکٹ براہ راست ایکشن ملاحظہ کرسکتے ہیں۔دونوں ٹیموں کے مابین سیریز میں شامل ون ڈے انٹرنیشنل میچز آئی سی سی مینز کرکٹ ورلڈکپ سپر لیگ کا حصہ ہیں۔ تینوں ون ڈے انٹرنیشنل میچز مقامی وقت کے مطابق سہ پہر 3 بجے جبکہ ٹی ٹونٹی انٹرنیشنل میچ مقامی وقت کے مطابق رات 8:30 بجے شروع ہوگا۔
ون ڈے انٹرنیشنل سیریز کے لیے ٹکٹوں کی قیمتیںاس طرح ہوں گی ۔وسیم اکرم اور وقار یونس انکلوژرز 3 ہزار روپے،فضل محموداور عمران خان انکلوژرز 2 ہزار روپے،راجاز اور سعید انور انکلوژرز ڈیڑھ ہزار روپے،عبدالقادر، اے ایچ کاردار، جاوید میانداد اور سرفراز نواز انکلوژرزایک ہزار روپے،حنیف محمد، امتیاز احمد، انضمام الحق، ماجد خان، نذر، قائد، سعید احمداور ظہیر عباس انکلوژرز پانچ سو روپے،ٹی ٹونٹی انٹرنیشنل میچ کے لیے ٹکٹوں کی قیمت وسیم اکرم اور وقار یونس انکلوژرز 4 ہزار روپے،فضل محموداور عمران خان انکلوژرز 3 ہزار روپے،راجاز اور سعید انور انکلوژرز ڈھائی ہزار روپے،عبدالقادر، اے ایچ کاردار، جاوید میانداد اور سرفراز نواز انکلوژرز ایک ہزار روپے جبکہ حنیف محمد، امتیاز احمد، انضمام الحق، ماجد خان، نذر، قائد، سعید احمداور ظہیر عباس انکلوژرز پانچ سو روپے میں دستیاب ہو گی۔

یہ بھی پڑھیں: ثانیہ عاشق بہن ہے ،بے دھیانی میں دوپٹے سے چہرہ صاف کیا، مفتاح اسماعیل کی وضاحت