اپنا کھیت اپنا روزگار سکیم , پنجاب حکومت کا زمین اور گرانٹ دینے کا اعلان

(24نیوز)صوبائی وزیر اطلاعات عظمیٰ بخاری نے کہا ہے کہ پنجاب حکومت نے بے روزگار اور بے زمین افراد کیلئے "اپنا کھیت اپنا روزگار سکیم" کا باقاعدہ آغاز کر دیا۔

عظمیٰ بخاری کا اپنے بیان میں کہنا تھا کہ اس سے قبل حکومت اپنی چھت اپنا گھر اور بے گھر افراد میں مفت پلاٹس کی تقسیم جیسے منصوبے بھی متعارف کرا چکی ہے، جبکہ اب نئی سکیم کے تحت زرعی شعبے میں روزگار کے مواقع فراہم کیے جائیں گے۔

صوبائی وزیر کے مطابق یہ اپنا کھیت اپنا روزگار سکیم وزیر اعلیٰ مریم نواز کا فلیگ شپ پروگرام ہے، جس سے صوبے میں زرعی انقلاب آنے کی توقع ہے اور ہزاروں افراد مستفید ہوں گے،حکومت بے زمین دیہاتیوں کو زمین فراہم کرنے کے ساتھ 50 ہزار سے ڈھائی لاکھ روپے تک کی گرانٹ بھی دے گی، جبکہ مجموعی طور پر 160 ارب روپے مالیت کی اراضی تقسیم کی جا رہی ہے، جو صرف کاشتکاری کے لیے استعمال ہوگی۔

 ان کا کہنا تھا کہ مریم نواز دعووں کے بجائے عملی اقدامات پر یقین رکھتی ہیں اور اسی وژن کے تحت کسانوں کو کسان کارڈ، گرین ٹریکٹر، سپر سیڈر اور ٹیوب ویل کی سولرائزیشن جیسی سہولیات فراہم کی گئی ہیں۔

عظمیٰ بخاری نے مزید کہا ہے کہ ان اقدامات کے نتیجے میں پنجاب میں گندم کی ریکارڈ پیداوار ہوئی ہے اور وزیر اعلیٰ مریم نواز کسانوں کی خوشحالی اور زرعی ترقی کو اپنی اولین ترجیح بنا چکی ہیں۔

 یہ بھی پڑھیں: ایک ہفتے کیلئے پیٹرولیم مصنوعات کی قیمتوں سے متعلق اہم خبر