یوم پاکستان: مختلف شعبہ جات کی متحرک شخصیات کو سول ایوارڈ سے نوازا جائے گا

(ویب ڈیسک) یوم پاکستان کے موقعہ پر مختلف شعبہ جات میں خدمات سر انجام دینے والی 829 شخصیات کو سول ایوارڈ سے نوازا جائے گا۔

تفصیلات کے مطابق 3 شخصیات کو ستارہ امتیاز، 9 کو تمغہ امتیاز، 7 کو نشان امتیاز ملے گا، 2 شخصیات کو ہلال پاکستان، ایک کو ہلال شجاعت، 40 کو ہلال امتیاز اور 18 کو ہلال قائداعظم کے ایوارڈ سے نوازا جائے گا، ایک شخصیت کو ستارہ پاکستان، 20 کو ستارہ شجاعت، 63 کو ستارہ امتیاز ملے گا۔

70 افراد صدارتی ایوارڈ برائے حسن کارکردگی حاصل کریں گے، 3 شخصیات کو ستارہ قائداعظم، 4 کو ستارہ خدمت، 25 کو تمغہ شجاعت ملے گا، 260 شخصیات کو تمغہ امتیاز، چار کو تمغہ خدمت ایوارڈ ملے گا۔

کورونا کے دوران صحت کے شعبہ میں خدمات دینے والی 299 شخصیات کو تمغہ امتیاز دیا جائے گا، ایوان صدر میں کل 80 سے زائد شخصیات کو سول اعزازات سے نوازا جائے گا، اعزازات کی تقریبات چاروں صوبائی گورنرز ہاؤس میں بھی ہوں گی۔

سول ایوارڈ حاصل کرنے والی اہم شخصیات میں فواد حسن فواد، افتخار عارف، ہاکی کے کھلاڑی اصلاح الدین شامل ہیں، عوامی خدمات پر سید قائم علی شاہ، راجہ ظفر الحق، ڈاکٹرشمشاد اختر ایوارڈ حاصل کریں گی۔

مزید پڑھیں:  پاکستان سمیت دنیا بھر میں آج ’’ارتھ آور‘‘ منایا جائے گا

پاکستان کیلئے خدمات دینے پر شہزادہ خالد بن سلمان بن عبدالعزیزالسعود بھی ایوارڈ حاصل کریں گے، بیوروکریٹ مشتاق سکھیرا، راحت علی خان، انور مسعود، زاہد ملک صحافی، ماہر معیشت ڈاکٹر محمد جہانزیب خان بھی ایوارڈ لینے والوں میں شامل ہیں۔

طارق فاطمی، طارق باجوہ، طارق پاشا بھی ایوارڈ لینے والوں میں شامل ہیں، 18 سفرا کو ہلال قائد اعظم دیا جائے گا، فنکارہ شبنم، گلوکار فاخر محمود، صحافی واصف ناگی، کوہ پیما نائلہ کیانی بھی ایوارڈ لینے والوں میں شامل ہیں۔