اجے دیوگن اور شاہد آفریدی کا پرانا ویڈیو وائرل،بھارتی اداکار پر سخت تنقید

(ویب ڈیسک)بھارت اور پاکستان کے درمیان جاری تنازع کے درمیان بالی ووڈ اداکار  اجے دیوگن اور  پاکستانی کھلاڑی شاہد آفریدی کا ایک پرانا ویڈیو دوبارہ سامنے آیا ہے، جو سوشل میڈیا پر وائرل ہورہا ہے اور جس پر سخت تنقید کی جارہی ہے۔ بھارتی لوگوں نے بالی ووڈ ایکٹر پر’’موقع پرست‘‘ ہونے کاالزام عائد کردیا۔اجے دیوگن کی فلم ’’سن آف سردار 2‘‘کی ریلیز سے قبل ہی اس کے بائیکاٹ کا مطالبہ کیا جارہا ہے۔

بھارتی ذرائع ابلاغ کی رپورٹ کے مطابق ورلڈ چمپئن لیجنڈزان برمنگھم2024 کے اس وائرل ویڈیو میں اجے دیوگن کو ایجبسٹن اسٹیڈیم میں شاہد آفریدی سے ہاتھ ملاتے ہوئے دیکھا جاسکتا ہے۔ اس وقت ان کی یہ ملاقات عام تھی لیکن بھارت اور پاکستان کے درمیان جاری تنازع کے درمیان یہ ویڈیو دوبارہ سوشل میڈیا پر وائرل ہوگیا ہے۔ ایک ایکس (سابقہ ٹویٹر) صارف نے اپنے پوسٹر میں اجے دیوگن پر ’’موقع پرست‘‘ ہونے کاالزام عائد کرتے ہوئے دعویٰ کیا ہے کہ ان کی قوم پرستی کا دعویٰ ایک ’’ پی آر اسٹنٹ ‘‘ ہے۔ ‘‘ دوسرے صارف نے تنقید کی ہے کہ ’’دیش بھکت، آئی ٹی سیل کے پسندیدہ اجے دیوگن شاہد آفریدی کے ساتھ لطف اندروز ہورہے ہیں۔ وہ لوگ جنہوں نے ترکی کا دورہ کرنے پر عامر خان پر تنقید کی تھی، اب خاموش ہیں۔

دوسری جانب اجے دیوگن کی فلم ’’سن آف سردار2‘‘کی ریلیز سے قبل ہی اس کے بائیکاٹ کا مطالبہ کیا جارہا ہے۔ ایک صارف نے ایکس پر ٹویٹ کہا ہے کہ اجے دیوگن شاہد آفریدی سے مل رہے ہیں، انکی فلم ’’سن آف سردار 2‘‘ بھی ریلیز ہورہی ہے، آپ سب جانتے ہیں کہ کیا کرنا ہے۔دیگر صارفین نے اجے دیوگن پر اپنے مفاد کیلئے اپنی شخصیت کو تبدیل کرنے کا الزام بھی عائد کیا۔ ایک صارف نے لکھا ہے کہ وہ حب الوطنی پر مبنی کردار نبھاتے ہیں۔ دوسرے صارف نے دعویٰ کیا ہے کہ اجے دیوگن پاکستانی دہشت گرد شاہد آفریدی سے بات چیت کررہے ہیں، جلد ہی بہت کچھ ہونے والا ہے۔  

واضح رہے کہ بھارتی کھلاڑیوں جن میں شیکھر دھون بھی شامل ہیں، ان کے ورلڈ چمپئن آف لیجنڈز (ڈبلیو سی ایل) سے نکلنے کے بعد بھارت اور پاکستان کے درمیان متوقع میچ بھی منسوخ کر دیا گیا ہے۔ مشہور کھلاڑیوں جیسے سریش رائنا اور شیکھر دھون نے عوامی طور پر اس میچ کا حصہ بننے سے انکار کیا ہےجبکہ دیگر کھلاڑیوں نے بھی خاموشی سے میچ نہ کھیلنے کا اظہار کیا۔

یہ بھی پڑھیں:’’میگھالیہ مرڈر کیس‘‘کیا عامر خان نے اگلی فلم کیلئےاچھوتی کہانی کا انتخاب کرلیا ؟