طلبہ کیلئے بڑی خوشخبری، نئے سکالرشپ پروگرام کا اعلان 

(ویب ڈیسک)یونیورسٹی آف لاہور (UOL) نے نئے سکالرشپ پروگرام کا اعلان کر دیا، جس کے تحت انٹرمیڈیٹ یا مساوی امتحانات میں 90 فیصد یا اس سے زیادہ نمبر حاصل کرنے والے طلبہ کو مکمل تعلیمی اخراجات پر داخلہ دیا جائے گا۔

یونیورسٹی کی جانب سے جاری بیان کے مطابق یہ اقدام اہل طلبہ کو تمام بیچلرز ڈگری پروگرامز میں ٹیوشن فیس سے مکمل استثنیٰ فراہم کرے گا۔

یونیورسٹی آف لاہور کے بورڈ آف گورنرز کے چیئرمین اویس رؤف نے کہا کہ اس پروگرام کا مقصد یہ یقینی بنانا ہے کہ مالی مسائل طلبہ کی صلاحیتوں کی راہ میں رکاوٹ نہ بنیں۔

یہ سکالرشپ سائنسز، تخلیقی فنون، سماجی علوم، مینجمنٹ، الائیڈ ہیلتھ سائنسز، فارمیسی، انجینئرنگ، ٹیکنالوجی اور انفارمیشن ٹیکنالوجی سمیت مختلف شعبہ جات پر لاگو ہوگی۔

یونیورسٹی کے مطابق ان شعبوں کا انتخاب اس بات کی عکاسی کرتا ہے کہ پاکستان کو صحت، اختراع اور ٹیکنالوجی کے میدان میں ماہرین کی بڑھتی ہوئی ضرورت ہے۔

یہ بھی پڑھیں:پیپلز پارٹی نے پنجاب حکومت سے بڑے مطالبات کر دیئے

یونیورسٹی نے مزید کہا کہ اس سکالرشپ پروگرام کا مقصد ایسے نئے گریجویٹس تیار کرنا ہے جو قومی ترقی میں مؤثر کردار ادا کر سکیں اور ملک کی عالمی سطح پر مسابقتی حیثیت کو مضبوط بنا سکیں۔