کراچی میں غیر ملکیوں کی گاڑی پرخودکش دھماکہ، 2 دہشتگرد ہلاک، سکیورٹی گارڈ شہید

(انوشہ جعفر)کراچی کے علاقے لانڈھی کی مانسہرہ کالونی میں غیر ملکیوں کی گاڑی پر  ہونے والے خودکش دھماکے میں 2 دہشتگرد ہلاک  جبکہ ایک سکیورٹی گارڈ دوران علاج دم توڑ گیا۔

ایس ایس پی ملیر طارق مستوئی کے مطابق گاڑی پرخودکش حملہ ہوا ، دھماکے کے بعد پولیس اور  ریسکیو ٹیمیں جائے واقعہ پر پہنچیں اور امدادی سرگرمیاں شروع کرکے واقعے کے زخمیوں کو ہسپتال منتقل کیا گیا،پولیس کا کہنا ہے کہ جس گاڑی کو نشانہ بنایا گیا ہے اس میں غیر ملکی سوار تھے، دھماکے کے وقت فائرنگ بھی کی گئی تھی، دھماکے میں تین افراد زخمی ہوئے۔

پولیس کے مطابق واقعے میں جاں بحق ہونے والے افراد کی تاحال شناخت نہیں ہو پائی  تاہم دھماکے میں زخمی ہونے والے دو افراد 45 سالہ نور محمد اور 45 لنگر خان کے ناموں سے  شناخت ہوئی ہے دونوں سکیورٹی گارڈ تھے اور غیر ملکیوں کی حفاظت کیلئے ان کے ساتھ گاڑی میں موجود تھے۔

پولیس کا کہنا ہے دھماکے کا نشانہ بننے والی غیر ملکیوں کی گاڑی کے قریب موٹرسائیکلیں بھی ملی ہیں، دھماکے کے نتیجے میں متاثرہ گاڑی کے اگلے حصے کو شدید نقصان پہنچا ہے،پولیس کے مطابق خودکش حملے کا نشانہ بننے والی وین میں 5 غیر  ملکی سوار تھے، وین میں سوار  تمام غیر ملکی محفوظ ہیں، غیرملکیوں کو محفوظ مقام  پر  منتقل کر دیاگیاہے، ایک خودکش حملہ آور دھماکے میں ہلاک ہوا جبکہ اس کے دوسرے ساتھی کو پولیس نے فائرنگ کرکے ہلاک کیا۔

پولیس کا کہنا ہے ابتدائی اطلاعات کے مطابق مقابلے میں مارا گیا دوسرا دہشتگرد بھی خود کش بمبارتھا، ہلاک دہشتگرد کے جسم سے خود کش جیکٹ اور گرینیڈ بندھا ہوا ہے، دھماکے کی جگہ کے قریب موجود ایک گاڑی اور  موٹر سائیکل کو نقصان پہنچا، بم ڈسپوزل اسکواڈ کی ٹیم اس جگہ کا معائنہ کرے گی،پولیس حکام کا کہنا ہے کہ غیر ملکی ایکسپورٹ پروسسنگ زون میں کام کرتے ہیں، وین کو موٹرسائیکل پر سوار خود کش بمبار کے ذریعے نشانہ بنایا گیا، جائے وقوع سے کلاشنکوف اور دستی بم سے بھرا بیگ بھی ملا ہے۔

ہسپتال حکام کا کہنا ہے کہ دھماکے کے زخمیوں میں نور محمد، لنگر خان اور سلمان رفیق شامل ہیں، 2 کی حالت تشویشناک ہے، دھماکے کے زخمیوں میں کوئی غیر ملکی شامل نہیں ہے۔ بعد ازاں ایک سکیورٹی گارڈ نور محمد دوران علاج دم توڑ گیا جبکہ دوسرا سکیورٹی گارڈ سلمان رفیق وینٹی لیٹر پر ہے۔

 مزید پڑھیں:  اسرائیل نے ایران کے شہر اصفہان پرمیزائل حملہ کر دیا

دوسری جانب وزیراعلیٰ سندھ سید مراد علی شاہ نے مانسہرہ کالونی میں گاڑی میں دھماکے کی  رپورٹ  طلب کرلی۔ وزیراعلیٰ سندھ کو رپورٹ میں بتایا گیا کہ پولیس کی بروقت کارروائی سےغیر ملکی مہمانوں محفوظ رہے صرف ان کا ایک گارڈ زخمی ہوا ۔ وزیراعلیٰ سندھ نے دھماکے میں استعمال ہونے والے بارود کی بھی تفصیلات معلوم کی۔ وزیراعلیٰ سندھ نے غیر ملکی مہمانوں کی سکیورٹی پر معمور سکیورٹی کے علاج کا فوری بندوبست کرنے کی ہدایت  دے دی۔ وزیراعلیٰ سندھ نے آئی جی کو واقعے کی تحقیقات کر کے رپورٹ دینے کی ہدایت کہا۔ ہدایت میں اُن کا کہنا ہے کہ یہ دہشت گرد کون تھے ، کہاں سے آئے تھے اور ان کی سہولتکاروں سمیت تمام معلومات حاصل کی جائے ۔

وزیراعلیٰ سندھ کا کہنا تھا کہ ملک دشمن عناصر امن امان خراب کرنا چاہتے ہیں جس کی کسی قیمت اجازت نہیں دی جائیگی ۔ پولیس کی بروقت کاروائی بہترین اقدام تھا۔

صدر آصف زرداری، وزیراعظم شہبازشریف اوروفاقی وزیرداخلہ محسن نقوی کی کراچی دھماکے کی مذمت  کرتے ہوئے کہنا ہے کہ ہم قوم کیساتھ ملکر دہشت گردی کا مقابلہ کریں گے،دہشت گردی کے مکمل خاتمے تک چین سے نہیں بیٹھیں گے، بروقت کارروائی پرپولیس کوبھی سراہا۔

 چیئرمین پیپلزپارٹی بلاول بھٹوزردار ی اور وزیراطلاعات سندھ شرجیل میمن نےبھی کراچی دھماکے کی مذمت کی ۔