عالمی منڈی میں سونے کی قیمت میں اضافہ، سرمایہ کار محتاط

(ویب ڈیسک)عالمی منڈیوں میں جغرافیائی سیاسی کشیدگی اور امریکا کے اہم افراطِ زر کے اعداد و شمار سے قبل سرمایہ کاروں نے محتاط رویہ اختیار کیے رکھا، جبکہ سونے کی قیمت میں اضافہ ریکارڈ کیا گیا۔

اسپاٹ گولڈ کی قیمت 0.46 فیصد بڑھ کر 4,389.03 ڈالر فی اونس ہوگئی، ماہرین کے مطابق مشرقِ وسطیٰ میں جاری کشیدگی اور عالمی سطح پر بڑھتی ہوئی غیر یقینی صورتحال کے باعث سونے کو محفوظ سرمایہ کاری کے طور پر طلب مل رہی ہے۔

دوسری جانب عالمی مالیاتی منڈیوں میں سرمایہ کاروں کی توجہ امریکا کے صارف قیمت اشاریہ (CPI) کے اعداد و شمار پر مرکوز رہی، جولائی میں امریکی افراطِ زر میں معمولی اضافے کی توقع ظاہر کی جا رہی ہے، جبکہ سالانہ افراطِ زر کی شرح 3.5 فیصد سے کم ہوکر 3.4 فیصد رہنے کا امکان ہے۔

ماہرین کے مطابق امریکی افراطِ زر کے اعداد و شمار آئندہ ماہ فیڈرل ریزرو کی شرحِ سود سے متعلق فیصلے کے حوالے سے اہم اشارے فراہم کرسکتے ہیں۔

یہ بھی پڑھیں:نوجوانوں کی صلاحیتوں کا بھرپور اظہار خوشحال، پُرامن اور مضبوط پاکستان کی تعمیر کیلئے ناگزیر ہے:صدر، وزیراعظم

ادھر ایشیائی حصص میں معمولی بہتری دیکھی گئی، تاہم شمالی کوریا کے میزائل تجربے اور خطے میں بڑھتی ہوئی فوجی کشیدگی کے باعث سرمایہ کار محتاط رہے، جاپانی ین بھی ڈالر کے مقابلے میں تقریباً مستحکم رہا۔