عدالتی فیصلے نیب نیازی گٹھ جوڑ کے منہ پر طمانچہ ہیں۔ مریم اورنگزیب

(24 نیوز)پاکستان مسلم لیگ (ن) کی ترجمان مریم اورنگزیب نے جھوٹے مقدمات بنانے پر وزیراعظم، چیئرمین نیب اور شہزاد اکبر کو سزا دینے کا مطالبہ کردیا۔

تفصیلات کے مطابق پاکستان مسلم لیگ (ن) کی ترجمان مریم اورنگزیب نے کہا ہے کہ اعلی عدلیہ کے فیصلوں کے بعد شرم ہو تو عمران صاحب، چیئرمین نیب اور شہزاد اکبر کو استعفیٰ دینا چاہیے ۔ اپنے بیان میں انہوں نے کہاکہ اپوزیشن کو سیاسی انتقام پر سزائے موت کی چکیوں اور قید خانوں میں رکھنے والوں کے خلاف کارروائی ہونی چاہئے ، مقدمات بننے چاہئیں،3 سال میں جھوٹے مقدمات، بے بنیاد الزامات اور تہمتیں لگانے والوں کے چہرے جھوٹ کی سیاہی سے داغدار ہوچکے ہیں۔
مریم اورنگزیب کا کہنا تھا کہ شہبازشریف،شاہد خاقان عباسی، خواجہ سعد رفیق، احسن اقبال، مفتاح اسماعیل سمیت دیگر رہنماوںکے خلاف مقدمات میں عدالتی فیصلے سیاسی انتقام بے نقاب کرچکے ہیں ۔
 انہوں نے کہاکہ عمران صاحب، چیئرمین نیب اور شہزاد اکبر کے خلاف مقدمات قائم ہونے چاہئیں، قوم کے وسائل جھوٹے مقدمات پر ضائع کرنے کا حساب لیاجائے ،پوچھا جائے کہ کیوں جھوٹے الزامات لگائے، تین سال اور اس سے پہلے میڈیا ٹرائل کیاگیا؟،ایک روپے کی کرپشن ثابت نہ ہونا، کوئی ثبوت نہ ہونا، عمران صاحب کے جھوٹے بیانیے کی موت ہے ۔
 انہوں نے کہاکہ نیب نیازی گٹھ جوڑ نے پاکستان کے امیج، ملک میں معاشی گروتھ اور عوام کے اعتماد کو اپنے جھوٹے بیانیے سے ٹھیس پہنچائی ،ملک کو 5.8 فیصد شرح ترقی، 3 فیصد مہنگائی، دوکروڑ افراد کو خط غربت سے نکالنے والے سزائے موت کی چکیوں میں قید کئے گئے ،آٹا چینی، دوائی، ایل این جی، رنگ روڈ کے لٹیرے اور چور اقتدار کے ایوانوں میں ہیں ۔
ترجمان ن لیگ نے کہا کہ ملک کو لوڈ شیڈنگ سے نجات دلانے، صنعت زراعت کا پہیہ چلانے، تعلیم اور صحت کے منصوبے لانے والوں کے مقدر میں قید خانہ ہے ،ووٹ چور، معیشت چور، تعلیم اور علاج مہنگا کرنے، مفت دوائیاں چھیننے والے اقتدار کے ایوانوں میں ہیں۔
یہ بھی پڑھیں: سرکاری یونیورسٹی ملازمین کو سپیشل الاونس نہ دینے کا فیصلہ