پاکستان کی سویڈن میں عید الاضحیٰ کے روز قرآن پاک نذرآتش کرنےکی شدید مذمت

(ویب ڈیسک)پاکستان کی جانب سے سوئیڈن میں مسجد کے باہر قرآن پاک کی بے حرمتی کے مذموم فعل کی شدید الفاظ میں مذمت کی گئی ہے۔

 ترجمان دفتر خارجہ کی جانب سے جاری بیان میں کہا گیا ہے کہ آزادی اظہار کے نام پر نفرت اور تشدد پر اکسانے کو جائز قرار نہیں دیا جا سکتا، ریاستوں کا فرض ہے کہ وہ مذہبی منافرت کی وکالت پر پابندی عائد کریں، مغرب میں گزشتہ چند ماہ سے اسلام فوبیا کے واقعات پر سنگین سوال اٹھتا ہے۔

انہوں نے کہا آزادی اظہار کا حق نفرت کو ہوا دینے اور بین المذاہب ہم آہنگی کو سبوتاژ کرنے کا لائسنس فراہم نہیں کرتا، واقعے پر پاکستان کے تحفظات سوئیڈن تک پہنچائے جا رہے ہیں، اسلامو فوبیا اور مسلم دشمنی کے بڑھتے ہوئے واقعات کو روکنے کیلئے قابل اعتماد اور ٹھوس اقدامات کئے جائیں۔