فیراری نے اپنی پہلی مکمل الیکٹرک گاڑی متعارف کرادی

(ویب ڈیسک) اطالوی لگژری اسپورٹس کار ساز کمپنی فیراری نے اپنی پہلی مکمل الیکٹرک گاڑی “Luce” متعارف کراتے ہوئے آٹو انڈسٹری میں ایک نئے دور کا آغاز کر دیا ہے۔ یہ اقدام ایسے وقت میں سامنے آیا ہے جب کئی بڑے یورپی اور عالمی کار ساز ادارے الیکٹرک گاڑیوں کی مانگ میں سست روی کے باعث اپنی حکمت عملی پر نظرثانی کر رہے ہیں۔

بین الاقوامی خبر رساں ادارے کے مطابق فیراری کی نئی “Luce” ایک پانچ سیٹوں والی لگژری الیکٹرک گاڑی ہے، جس کی قیمت تقریباً 5 لاکھ 50 ہزار یورو (تقریباً 6 لاکھ 40 ہزار ڈالر) رکھی گئی ہے۔ کمپنی کے مطابق اس گاڑی کی ترسیل 2026 کی آخری سہ ماہی میں شروع کی جائے گی۔

“Luce” کو فیراری کی تاریخ میں ایک اہم موڑ قرار دیا جا رہا ہے کیونکہ یہ پہلی بار ہے کہ کمپنی نے مکمل طور پر الیکٹرک پاور ٹرین پر مبنی گاڑی تیار کی ہے، اس ماڈل کو سابق ایپل ڈیزائن چیف جونی آیو اور ان کے تخلیقی گروپ  کے تعاون سے تیار کیا گیا ہے۔

 یہ بھی پڑھیں:ایل پی جی سلنڈر خریدنے پر  پابندی عائد

فیراری کے مطابق اس گاڑی میں چار الیکٹرک موٹرز نصب ہیں، یعنی ہر پہیے کے لیے ایک موٹر، جو مجموعی طور پر 1,000 ہارس پاور سے زائد طاقت فراہم کرتی ہیں، اس کی زیادہ سے زیادہ رفتار 310 کلومیٹر فی گھنٹہ سے تجاوز کر سکتی ہے جبکہ ایک چارج پر اس کی رینج 500 کلومیٹر سے زیادہ بتائی گئی ہے۔

کمپنی کے مطابق “Luce” میں لگژری اور جدید ٹیکنالوجی کا امتزاج پیش کیا گیا ہے، جس میں چمڑے، ایلومینیم اور گلاس انٹیرئیر کے ساتھ ساتھ فزیکل کنٹرولز بھی شامل ہیں، جو اسے روایتی اور مکمل ڈیجیٹل EV ڈیزائن سے مختلف بناتے ہیں۔

ماہرین کے مطابق فیراری کا یہ قدم اس بات کی علامت ہے کہ لگژری اسپورٹس کار مارکیٹ اب الیکٹرک ٹیکنالوجی کی طرف تیزی سے منتقل ہو رہی ہے، اور آنے والے برسوں میں عالمی آٹو انڈسٹری میں بڑی تبدیلیاں متوقع ہیں۔