’’ڈونٹ کال می پلے بوائے‘‘تعلقات میں ہمیشہ وفادار رہا ہوں،کارتک آرین پھٹ پڑے

 (ویب ڈیسک)بھارتی فلم انڈسٹری بالی ووڈ کے اداکار کارتک آرین اور اننیا پانڈے کی اداکاری والی فلم “تو میری میں تیرا میں تیرا تو میری” 25 دسمبر کو سینما گھروں میں ریلیز ہونے والی ہے۔ کارتک اور اننیا دونوں فلم کی تشہیر میں مصروف ہیں۔ فلم کی تشہیر کے دوران کارتک نے اپنے اردگرد پلے بوائے کے ٹیگ کا جواب دیا۔ کارتک کو پہلے اننیا پانڈے کے ساتھ اور بعد میں سارہ علی خان کے ساتھ جوڑا گیا تھا ، جس کی وجہ سے آرین پر پلے بوائے کا ٹیگ لگ گیا ۔ ایک انٹرویو میں انہوں نے واضح کیا کہ وہ پلے بوائے نہیں ہیں، وہ تعلقات میں ہمیشہ وفادار رہے ہیں۔

بھارتی ذرائع ابلاغ کی رپورٹ کے مطابق  اداکار کارتک آرین نے شوبز میگزین فلم فیئر کے ساتھ ایک حالیہ انٹرویو میں کہا کہ ’’میں کبھی پلے بوائے نہیں رہا۔ میں ہمیشہ وفادار رہا ہوں۔ ہمیشہ۔ میں آپ کو بتاتا ہوں کہ کیا ہوتا ہے، میڈیا کا ہمیشہ ایک نقطہ نظر ہوتا ہے۔ تعلقات کی ٹائم لائنز، افواہیں، میڈیا کی کہانیاں… میں اس تناظر سے بات کر رہا ہوں، کبھی کوئی اوورلیپ نہیں ہوا، یہ سب میڈیا کی قیاس آرائیاں ہیں‘‘۔کارتک آرین نے کہا ، چیزوں کو بڑھا چڑھا کر پیش کیا جاتا ہے، انہوں نے یہ بھی وضاحت کی کہ کسی کی ذاتی زندگی کے بارے میں خبریں عوامی شخصیت ہونے کا حصہ ہیں۔ کارتک نے کہا  کہ میں کبھی بھی اپنے رشتوں کے بارے میں بات نہیں کرتا۔ ہر اداکار اور انکی ذاتی زندگی کے بارے میں ہمیشہ کہانیاں آتی ہیں۔ جب آپ انڈسٹری میں ہوتے ہیں تو سب کچھ بے ترتیب ہو جاتا ہے۔ اگر آپ میرے رشتوں کے بارے میں بات کرتے ہیں، جیسے کالج کے رومانس، تو لوگ فوراً ان پر لیبل لگانا شروع کر دیتے ہیں۔ اور اکثر یہ چیزیں سچ نہیں ہوتیں۔

یاد رہےکہ اداکار کارتک آرین کی ڈیٹنگ کی تاریخ اکثر خبروں میں رہی ہے۔ ان کا نام سارہ علی خان کے ساتھ جڑا تھا۔ دونوں مبینہ طور پر 2020 کی فلم “لو آج کل 2” کی شوٹنگ کے دوران ڈیٹنگ کر رہے تھے۔ تاہم بعد میں خبریں سامنے آئیں کہ وہ علیحدگی اختیار کر چکے ہیں۔ کارتک کو جھانوی کپور اور اننیا پانڈے سے بھی جوڑا گیا ہے، لیکن انہوں نے بار بار کہا ہے کہ وہ “100فیصد سنگل” ہیں اور اپنے کام پر توجہ مرکوز کئے ہوئے ہیں۔ فی الحال، کارتک آرین کے بارے میں افواہیں ہیں کہ وہ اپنی ” عاشقی ‘‘ کی ساتھی اداکارہ شری لیلا کو ڈیٹ کر رہے ہیں۔ تاہم ابھی تک عوامی سطح پر کسی اس کی تصدیق نہیں ہو سکی ہے۔

یہ بھی پڑھیں:فیروز خان نے بچوں کی کسٹڈی سے انکار کردیا، علیزے سلطان کا دعویٰ