مشرق وسطیٰ کشیدگی :سونے کی قیمت دو ہفتے کی بلند ترین سطح پر پہنچ گئی

(ویب ڈیسک)سونے کی قیمت بدھ کے روز  دو ہفتے کی بلند ترین سطح پر پہنچ گئی، جس کی بڑی وجہ تکنیکی خریداری اور سرمایہ کاروں کی جانب سے مشرق وسطیٰ میں بڑھتی ہوئی کشیدگی کا جائزہ لینا ہے، سرمایہ کار آئندہ ہفتے ہونے والے امریکی فیڈرل ریزرو کے اجلاس کے منتظر ہیں تاکہ شرح سود کے مستقبل کے حوالے سے اشارے مل سکیں۔

اسپاٹ گولڈ کی قیمت 0.9 فیصد اضافے کے ساتھ 4,112.70 ڈالر فی اونس تک پہنچ گئی، جبکہ دن کے آغاز میں یہ 7 جولائی کے بعد بلند ترین سطح پر رہی،امریکی گولڈ فیوچرز برائے اگست ترسیل بھی تقریباً ایک فیصد بڑھ کر 4,116.90 ڈالر فی اونس پر پہنچ گئے۔

مشرق وسطیٰ میں بڑھتی ہوئی کشیدگی نے تیل کی قیمتوں میں اضافہ کیا ہے اور مہنگائی کے خدشات کو بڑھایا ہے، جس سے شرح سود میں اضافے کے امکانات مضبوط ہوئے ہیں، انہی خدشات کے باعث گزشتہ ہفتے سونے کی قیمتوں میں جون کے آغاز کے بعد سب سے بڑی ہفتہ وار کمی دیکھی گئی تھی۔

کے سی ایم ٹریڈ کے چیف مارکیٹ اینالسٹ ٹم واٹرر کے مطابق، حالیہ گراوٹ کے بعد خریدار سستے مواقع تلاش کرتے ہوئے مارکیٹ میں واپس آ رہے ہیں، جبکہ امریکا اور ایران کے درمیان سفارتی پیش رفت کی امیدیں بھی قیمتوں میں اضافے میں مدد دے رہی ہیں۔

امریکی وزیر خارجہ مارکو روبیو نے کہا ہے کہ واشنگٹن ایران بحران کے خاتمے کے لیے مذاکرات کے لیے اب بھی تیار ہے، تاہم تہران مذاکرات میں سنجیدہ دکھائی نہیں دیتا۔

یہ بھی پڑھیں:یورپ کا خواب، سمندر کی نذر!کشتی حادثہ کا شکار

دوسری جانب یمن کے ایران نواز حوثیوں کی دھمکیوں کے بعد سعودی خام تیل لے جانے والے تین آئل ٹینکرز نے بحیرہ احمر میں اپنا راستہ تبدیل کر لیا، جس سے توانائی کی فراہمی کے حوالے سے خدشات بڑھ گئے ہیں۔

رائٹرز کے ایک سروے کے مطابق، امریکی فیڈرل ریزرو 2026 کے اختتام تک شرح سود کو موجودہ سطح پر برقرار رکھ سکتا ہے، تاہم ایک الگ سوال کے جواب میں زیادہ تر ماہرین نے رواں سال شرح سود میں اضافے کے امکان کو "زیادہ" قرار دیا ہے۔

شرح سود کا طویل عرصے تک بلند رہنا سونے جیسی غیر منافع بخش سرمایہ کاری رکھنے کی لاگت بڑھا دیتا ہے۔

دیگر قیمتی دھاتوں میں چاندی کی قیمت 0.7 فیصد اضافے کے ساتھ 59.18 ڈالر فی اونس ہو گئی، جبکہ پلاٹینم 1.2 فیصد بڑھ کر 1,649.03 ڈالر اور پیلیڈیم 1.5 فیصد اضافے کے ساتھ 1,300.58 ڈالر فی اونس پر پہنچ گیا۔