پشاور سے لاہور  اسلحہ سمگلنگ کی کوشش ناکام

(24نیوز) پولیس نے پشاور سے لاہور اسلحہ اسمگل ہونے کی کوشش ناکام بنادی۔

تفصیلات کے مطابق  جہلم کی تحصیل سوہاوہ کے قریب پولیس نے ناکہ بندی کرکے پشاور سے لاہور اسلحہ سمگلنگ کی کوشش ناکام بناتے ہوئے 2ملزموں کو گرفتار کرلیا۔تھانہ سوہاوہ پولیس کے مطابق  پٹرولنگ پولیس مسہ کسوال نے خفیہ اطلاع پر ترکی ٹول پلازہ کے قریب ناکہ بندی کررکھی تھی، دوران ناکہ بندی پولیس نے ایک گاڑی کو رکنے کا اشارہ کیا تو ملزم گاڑی چھوڑ کر قریبی جنگل میں فرار ہوگئے، تاہم پولیس ٹیم نے ان کا پیچھا کرکے دونوں ملزموں کو گرفتار کرلیا۔

 گاڑی کی تلاشی میں 12 کلاشنکوف، 8 پسٹل، 40 میگزینز اور 3500 گولیاں برآمد ہوئیں، جبکہ ملزموں نے انکشاف کیا کہ وہ 30 مارچ کو دہشت گردی کی نیت سے اسلحہ پشاور سے لاہور لے کر جا رہے تھے۔ ملزموں کی شناخت علی رضا اور علی حیدر کے نام سے ہوئی  اور ان کے خلاف تھانہ سوہاوہ میں مقدمہ درج کرلیا گیا ہے۔