بھارت میں زیادتی کے واقعات میں اضافہ،ایک اور لڑکی کالج میں نشانہ بن گئی

(ویب ڈیسک)گزشتہ کچھ برسوں میں بھارت کے شہر بنگلورسمیت دیگر شہروں میں کالج کیمپسز کے اندر جنسی ہراسانی اور زیادتی کے واقعات میں اضافہ دیکھنے میں آیا ہے۔ ایسا ہی ایک افسوسناک واقعہ جنوبی بنگلورو کے ایک نجی انجینئرنگ کالج میں پیش آیا ہے، جہاں ایک طالب علم نے اپنی ساتھی طالبہ کا مردوں کے واش روم میں مبینہ جنسی زیادتی کا نشانہ بنا ڈالا ۔ پولیس نے ملزم کو گرفتار کرکے عدالتی تحویل میں بھیج دیا۔

بھارتی میڈیا رپورٹس کے مطابق جنوبی بنگلورو کے ایک نجی انجینئرنگ کالج میں انتہائی افسوسناک واقعہ پیش آیا، جہاں ایک طالبہ کے ساتھ اس کے ہی ساتھی طالب علم  21 سالہ ملزم جیون گوڑا نے مردوں کے واش روم میں مبینہ طور پر زیادتی کی۔ رپورٹس کے مطابق یہ واقعہ 10 اکتوبر کو پیش آیا، تاہم متاثرہ طالبہ نے 15 اکتوبر کو پولیس میں شکایت درج کرائی۔پولیس رپورٹ کے مطابق متاثرہ لڑکی اور ملزم ایک دوسرے کو پہلے سے جانتے تھے، کیونکہ دونوں ایک ہی کلاس کے طالب علم تھے۔ تاہم جیون گوڑا اپنی پڑھائی میں پیچھے رہ جانے کی وجہ سے ایک سال پیچھے رہ گیا تھا۔متاثرہ طالبہ نے پولیس کو بتایا کہ واقعے کے روز وہ جیون گوڑا سے اپنی کچھ چیزیں لینے کے لیے ملی تھی۔ دوپہر کے کھانے کے وقفے کے دوران، گوڑا نے اسے بار بار فون کر کے دوبارہ ملنے کے لیے کہا۔ جب وہ پہنچی تو اس نے مبینہ طور پر اسے زبردستی پکڑنے کی کوشش کی۔جب متاثرہ لڑکی وہاں سے لفٹ کے ذریعے نکلنے کی کوشش کر رہی تھی، تو ملزم نے اس کا پیچھا کیا اور اسے چھٹی منزل پر لے جا کر مردوں کے واش روم میں گھسیٹا اور مبینہ طور پر اس کے ساتھ زیادتی کی۔واقعے کے فوراً بعد، متاثرہ لڑکی نے اپنے دو دوستوں کو ساری تفصیل بتائی۔ ابتدائی طور پر متاثرہ لڑکی نے خوف اور شرمندگی کے باعث واقعہ رپورٹ کرنے میں ہچکچاہٹ ظاہر کی، تاہم بعد میں اس نے اپنے والدین کو بتایا، جنہوں نے اس کے ساتھ ہنومان تھانگر پولیس اسٹیشن جا کر باضابطہ شکایت درج کرائی۔پولیس نے ملزم کو فوری گرفتار کر لیا اور عدالت میں پیش کرنے کے بعد اسے عدالتی تحویل میں بھیج دیا گیا۔ پولیس ذرائع کے مطابق متاثرہ لڑکی کا طبی معائنہ مکمل کر لیا گیا ہے، اور ثبوت اکٹھے کیے جا رہے ہیں۔

بھارت کے شہر بنگلور جیسے جدید اور تعلیمی شہر میں یہ واقعہ پیش آنا شہری حلقوں میں تشویش کا باعث بنا ہے۔ ماہرین تعلیم اور سماجی کارکنوں کا کہنا ہے کہ کالج انتظامیہ کو سی سی ٹی وی مانیٹرنگ، شکایت سیل، اور بیداری پروگرامز کو مزید مؤثر بنانا چاہیے تاکہ ایسے واقعات کا سدِ باب کیا جا سکے۔

یہ بھی پڑھیں:پاکستان انٹرنیشنل سکرین ایوارڈز کیلئے نامزدگیوں کا اعلان