حکومت اور اپوزیشن کے درمیان مذاکرات کامیاب، معطل 26 ارکان کو بحال کرنے کا فیصلہ

(ویب ڈیسک)   پنجاب اسمبلی  میں 26  ارکان کی معطلی  اور  نااہلی ریفرنس  پر حکومتی اور  اپوزیشن کمیٹی کے  درمیان  معاملات  طے  پاگئے۔

 26 ارکان کی معطلی اور نااہلی ریفرنس کے معاملے پر پنجاب اسمبلی میں حکومتی و اپوزیشن کمیٹی کا اجلاس ختم ہوگیا،اجلاس میں ایوان میں نازیبا الفاظ استعمال نہ کرنے پراتفاق ہوا، سپیکر پنجاب اسمبلی ملک محمد احمد خان نے مذاکراتی کمیٹی کے مذاکرات کامیاب ہونے پر مبارک باد دی ہے،سپیکرملک محمد احمد خان کا کہنا ہے کہ گالم گلوچ کی روایات کو نہ دہرایا جائے، اپوزیشن کو احتجاج کا حق ہے مگر  آئین کے مطابق۔

 صوبائی وزیرپارلیمانی امور مجتبٰی شجاع الرحمان نے میڈیا  سےگفتگو میں بتایا کہ حکومت و اپوزیشن کے درمیان اتفاق رائے ہوگیا ہے، آج کا اجلاس نتیجہ خیز رہا آئندہ اجلاس میں اپوزیشن و حکومتی ارکان کی طرف سےگالم گلوچ اور ممبرکی تضحیک نہیں کی جائےگی۔

مجتبٰی شجاع الرحمان کا کہنا تھا کہ  اتفاق  رائے ہوا  ہےکہ لیڈر  آف دی اپوزیشن کی ایوان میں بات کو  وزن دیا جائےگا،کوئی نعرے بازی نہیں کی جائےگی جس سے لیڈر آف  اپوزیشن ڈسٹرب ہو ، وزیراعلیٰ مریم نواز کے خطاب میں بھی کوئی احتجاج نہیں ہوگا اور نہ نعرے لگیں گے۔

مجتبٰی شجاع الرحمان کا کہنا تھا کہ معطل 26 ممبران سینیٹ الیکشن میں ووٹ ڈال سکیں گے، معطل ارکان کی بحالی کا اعلان سپیکرخود کریں گے،بزنس ایڈوائزرکمیٹی میں جو فیصلہ ہوگا ،اس کے مطابق اجلاس چلائیں گے، ایتھکس کمیٹی دیکھےگی معاہدے کی خلاف ورزی ہوگی تو اس کی سزا کا تعین ہوگا.

یہ بھی پڑھیں: سی ڈی اے کے کمرشل پلاٹوں کی نیلامی،سرمایہ کاروں کی19.56 ارب روپے کی خریداری