تیل کی قیمتوں میں بڑا اضافہ، عالمی منڈی میں ہلچل

(ویب ڈیسک )عالمی منڈی میں خام تیل کی قیمتوں میں ایک بار پھر نمایاں اضافہ ریکارڈ کیا گیا ہے، جس سے توانائی بحران کے خدشات مزید بڑھ گئے ہیں۔

غیر ملکی خبر رساں ادارے کے مطابق ایران اور امریکہ کے درمیان بڑھتی ہوئی کشیدگی اور ہرمز آبنائے کے گرد غیر یقینی صورتحال کے باعث تیل کی قیمتوں میں تیزی دیکھنے میں آئی ہے۔

برینٹ کروڈ کی قیمت 3.35 فیصد اضافے کے ساتھ 109.26 ڈالر فی بیرل تک پہنچ گئی، جبکہ امریکی ویسٹ ٹیکساس انٹرمیڈیٹ (WTI) کروڈ 4.2 فیصد اضافے کے بعد 105.42 ڈالر فی بیرل پر بند ہوا۔

رپورٹ کے مطابق صرف ایک ہفتے کے دوران برینٹ کروڈ میں تقریباً 7.8 فیصد اور WTI میں 10 فیصد سے زائد اضافہ ریکارڈ کیا گیا ہے، جو خطے میں بڑھتی ہوئی غیر یقینی صورتحال کی عکاسی کرتا ہے۔

 یہ بھی پڑھیں:7 روپے فی لیٹر کمی ،تیل مزید سستا ہو گیا

ماہرین کے مطابق ہرمز آبنائے کے ذریعے دنیا کی تقریباً پانچویں حصہ تیل اور گیس کی ترسیل ہوتی ہے، تاہم خطے میں کشیدگی اور بحری جہازوں پر حملوں کے خدشات نے سپلائی چین کو متاثر کیا ہے۔

امریکی صدر ڈونلڈ ٹرمپ نے ایران پر سخت موقف اختیار کرتے ہوئے کہا ہے کہ وہ صبر کھو رہے ہیں، جبکہ ایران نے بھی مذاکرات اور ممکنہ جنگ دونوں کے لیے تیار ہونے کا عندیہ دیا ہے۔

توانائی ماہرین کا کہنا ہے کہ اگر صورتحال مزید خراب ہوئی تو عالمی منڈی میں تیل کی قیمتیں مزید بڑھ سکتی ہیں، جس سے مہنگائی اور معاشی دباؤ میں اضافہ ہوگا۔