ریسکیو ٹیم نے دولہا اور باراتیوں کو بحفاظت دریا پار کروا دیا 

(شہزاد احمد) عارف والا میں دریائے ستلج کے مقام پر پانی کی سطح مزید بلند ہوگئی جبکہ ریسکیو کی ٹیم نے احسن اقدام کرتے ہوئے سیلابی پانی میں دولہا اور باراتیوں کو بحفاظت بوٹ میں بیٹھا کر دریا پار کروا دیا۔

عارف والا دولہا محمد اسحاق 60 باراتیوں سمیت دلہنیا لینے جارہا تھا۔ دریائے ستلج کے مقام پر پانی کی سطح بلند ہونے سے بستی سیلابی پانی سے زیرآب آچکی تھی۔ 

مزید پڑھیں:  نگران وزیراعلیٰ پنجاب محسن نقوی سے جیل ریفارمز کمیٹی کی ملاقات

دریا پار کرنے پر باراتی اور دولہا نے ریسکیو کو خراج تحسین پیش کیا۔

واضح رہے کہ بھارت کی آبی جارحیت کے بعد پاکستانی دریاؤں میں پانی کا اضافہ ہونے لگا ۔دریائے ستلج میں ہیڈ سلیمانکی کے مقام پر پانی کےبہاؤ میں مزید اضافہ ہوگیا۔

   محکمہ آبپاشی کے اطلاعاتی نظام کے مطابق  دریائی علاقے میں سیلابی صورتحال میں مزید اضافہ ہوگیا ہے ۔ پانی کےبہاؤ میں مزید اضافے سے  سلیمانکی کے مقام پر درمیانے درجے کا سیلاب ہے جہاں پانی کا بہاؤ 83570 کیوسک ہے۔

 سیلاب کےممکنہ خطرے کے پیش نظرریلیف اورمتاثرین کے انخلا کیلئے کیمپس قائم کردیے گئے ہیں۔بہاولنگر، چشتیاں اور سلیمانکی کے متعدد مقامات پر ریلیف کیمپس قائم کردیےگئے ہیں،بہاولپور کور کے فوجی دستے اضافی سازوسامان کےساتھ مختلف مقامات پرموجود ہیں۔

 ادھربالائی علاقوں سے بارشوں کا پانی سندھ میں داخل ہونے سے بیراجوں پر پانی کی صورتحال نارمل ہوگئی ہے، سیلابی ریلہ 6 سے 7 روز میں سکھر بیراج پہنچےگا لیکن سیلاب کا کوئی خطرہ نہیں ہے، جب کہ کوٹ مٹھن کے مقام پر پانی کی سطح میں اضافہ ہو رہا ہے۔

 جھنگ میں دریائی پٹی کے ساتھ کھڑی فصلیں پانی کی زد میں آگئی ہیں، دریائے چناب میں جھنگ کے مقام پر سیلابی ریلے کے بہاؤ میں کمی آنے لگی، دریائے راوی میں نارووال سے سیلابی ریلہ گزرگیا جب کہ پانی کے بہاؤ میں کمی جاری ہے۔