عامرلیاقت کا پوسٹمارٹم کرانے کا فیصلہ کالعدم قرار
Stay tuned with 24 News HD Android App
(مانیٹرنگ ڈیسک) کراچی کی مقامی عدالت نے مرحوم ڈاکٹرعامر لیاقت حسین کا پوسٹمارٹم کرانے کا فیصلہ کالعدم قرار دیدیا۔
تفصیلات کے مطابق کراچی کے ایڈیشنل اینڈ ڈسٹرکٹ سیشن جج شرقی نے معروف اینکر پرسن ڈاکٹر عامر لیاقت کے پوسٹمارٹم کے جوڈیشل مجسٹریٹ کے فیصلے کیخلاف مرحوم کی بیٹی دعا عامر کی اپیل پر سماعت کی، عدالت نے دعا عامر کی درخواست کو منظور کرتے ہوئے عامر لیاقت حسین کے پوسٹمارٹم کے فیصلے کو کالعدم قرار دیا۔
خیال رہے کہ جوڈیشل مجسٹریٹ شرقی نے 18 جون کو عامر لیاقت کا پوسٹمارٹم کرانے کا حکم دیا تھا جو ایک شہری کی درخواست پر جاری کیا گیا۔عامر لیاقت کے ورثا نے پوسٹمارٹم کرانے کی مخالفت کی تھی اور ان کی بیٹی نے فیصلے کے خلاف اپیل دائر کی تھی۔
معروف اینکر پرسن اور سابق رکن قومی اسمبلی عامر لیاقت 9 جون کو کراچی میں انتقال کر گئے تھے، سیدہ بشریٰ اقبال عامر لیاقت کی پہلی اور سیدہ طوبیٰ دوسری بیوی تھیں جبکہ عامر لیاقت کی تیسری اہلیہ دانیہ ملک ہیں، پہلی بیوی سے ان کے دو بچے ایک بیٹا احمد عامر اور ایک بیٹی دعا عامر ہیں۔
یہ بھی پڑھیں:بارشیں، تیز ہوائیں،محکمہ موسمیات نے خبر دار کر دیا