آبنائے ہرمز میں احکامات کی خلاف ورزی برداشت نہیں ہوگی:امریکا کا بھارت کو انتباہ

(ویب ڈیسک)امریکی محکمہ خارجہ کی جانب سے جاری بیان کے مطابق وزیر خارجہ مارکو روبیو نے اپنے بھارتی ہم منصب سبرامنیم جے شنکر سے آبنائے ہرمز میں ہونے والی حالیہ پیشرفت پر بات چیت کی ہے۔

محکمہ خارجہ کے پرنسپل ڈپٹی ترجمان ٹامی پگوٹ کے مطابق دونوں عہدیداروں نے اس اسٹریٹجک آبی گزرگاہ میں سکیورٹی کی بدلتی ہوئی صورتحال پر تبادلہ خیال کیا۔

مارکو روبیو نے بھارتی وزیر خارجہ پر واضح کیا کہ تمام تجارتی جہازوں کیلئے امریکی افواج کی جانب سے جاری کردہ احکامات پر فوری عمل کرنا لازمی ہے کیونکہ امریکی افواج خطے میں امن و استحکام برقرار رکھنے کیلئے کام کر رہی ہیں۔

یہ بھی پڑھیں:میکسیکو میں 5.2  شدت کا زلزلہ،شہری  گھروں اور عمارتوں سے نکل آئے 

انہوں نے خبردار کیا کہ آبنائے ہرمز میں امریکی اقدامات کی خلاف ورزی جس میں ایرانی تیل کی غیر قانونی نقل و حمل بھی شامل ہے کسی صورت برداشت نہیں کی جائے گی۔