واٹس ایپ میں ڈیسک ٹاپ پر ایڈٹ بٹن شامل کرنے کی آزمائش جاری

(ویب ڈیسک) دنیا کی مقبول ترین میسیجنگ ایپلی کیشن واٹس ایپ ڈیسک ٹاپ پر بھیجے گئے میسیج میں ایڈٹ کا بٹن متعارف کرائے جانے کے فیچر پر کام کر رہی ہے اور جلد ہی اسے متعارف کرادیا جائے گا۔

واٹس ایپ سے قبل اسی کمپنی کی سوشل ویب سائٹ فیس بک اور شیئرنگ ایپلی کیشن انسٹاگرام پر بھی ایڈٹ بٹن کی سہولت دستیاب ہے جب کہ حال ہی میں ٹوئٹر نے بھی ایسے بٹن کو متعارف کرانے کا اعلان کیا تھا۔

اگرچہ واٹس ایپ کے حوالے سے چند ماہ قبل بھی یہ خبر سامنے آئی تھی کہ ایپلی کیشن ایڈٹ بٹن پر کام کر رہی ہے اور جلد ہی اسے متعارف کرائے جانے کا امکان ہے، تاہم تاحال ایسا نہیں ہوسکا۔

واٹس ایپ کی تبدیلیوں پر نظر رکھنے والی ویب سائٹ ’ویب ایٹ انفو‘ کے مطابق ایپلی کیشن کے ماہرین ڈیسک ٹاپ صارفین کے لیے ایڈٹ بٹن کو متعارف کرائے جانے پر کام کرنے میں مصروف ہیں۔

رپورٹ میں بتایا گیا کہ ابتدائی طور پر ایڈٹ بٹن پر محدود صارفین کو رسائی دی جائے گی اور ممکنہ طور پر اسے پہلے ڈیسک ٹاپ یعنی کمپیوٹر یا لیپ ٹاپ پر واٹس ایپ استعمال کرنے والے صارفین میں متعارف کرائے جائے گا۔

رپورٹ کے مطابق ابھی یہ واضح نہیں ہے کہ ایڈٹ بٹن کے بعد صارفین کو ایڈٹ ہسٹری بھی نظر آئے گی یا نہیں اور یہ بھی معلوم نہیں کہ صارفین کتنی دیر کے بعد میسیج کو ایڈٹ کرنے کے قابل ہوں گے۔