عثمان مرزا کیس میں ڈرامائی موڑ۔۔لڑکا لڑکی بیان سے منحرف۔۔وکیل بھی تبدیل کرلیا

(2 4 نیوز)عثمان مرزا کیس میں مدعی لڑکا لڑکی اپنے بیان سے منحرف ہوگئے، یہ ہمارے ملزم نہیں، عدالت میں بیان حلفی جمع کرادئیے گئے۔عثمان مرزا کیس میں متاثرہ لڑکے لڑکی نے وکیل بھی تبدیل کر لیا ۔

 رپورٹ کے مطابق اسلام آباد کی ڈسٹرکٹ سیشن عدالت ای الیون میں لڑکا اور لڑکی پر تشدد اور بلیک میل کرنیکا کیس پر سماعت ہوئی۔ متاثرہ لڑکی سندرہ اور لڑکا اسد اپنے وکیل کے ہمراہ ایڈیشن سیشن جج عطاء ربانی کے روبرو پیش ہوئے۔  دوران سماعت متاثرہ لڑکی اپنے بیان سے منحرف ہو گئی اور عدالت میں بیان حلفی جمع کروا دیا۔ متاثرہ لڑکی نےعدالت میں بیان دیا کہ پولیس نے یہ سارا معاملہ خود بنایا ہے، ۔ میں نے کسی بھی ملزم کو نہ شناخت کیا اور نہ ہی کسی پیپر پر دستخط کئے ہیں۔ میں نے بیان حلفی کسی کے دباؤ میں آکر نہیں دیا۔اس کے علاوہ عثمان مرزا کیس میں متاثرہ لڑکے لڑکی نے وکیل بھی تبدیل کر لیا ،متاثرہ لڑکے اورلڑکی کے پہلے وکیل حسن جاوید شورش کا موقف سامنے آگیا۔ وکیل حسن جاوید شورش نے کہا ہے کہ آج عدالت میں لڑکے لڑکی نے جو کچھ کہا اس سے متعلق میرے علم میں کچھ نہیں تھا ، لڑکا اور لڑکی کل تک میرے ساتھ رابطے میں تھے،آج بیان ریکارڈ کرانے سے متعلق میری لڑکے اور لڑکی سے دو دن پہلے ملاقات بھی ہوئی، وکیل حسن جاوید شورش نے مزید کہا کہ متاثرہ لڑکے اور لڑکی سے کل آخری دفعہ فون پر رابطہ ہوا تھا ،آج صبح رابطہ کرنے کی کوشش کرتا رہا لیکن کرکے اور لڑکی نے فون نہیں اٹھایا، اچانک دو بجے مجھے پتہ چلا کہ لڑکے لڑکی نے وکیل تبدیل کر لیا ہے۔

 یادرہے اسلام آباد کے ایک ہوٹل میں عثمان مرزا نامی شخص نے لڑکا اور لڑکی کو برہنہ کرکے ویڈیو بنائی اور پھر بلیک میل بھی کیا گیا تھا۔ پولیس نے متاثرہ نوجوان لڑکی اور لڑکے کے بیانات ریکارڈ کئے تھے جبکہ پولیس حکام کا کہنا تھا کہ متاثرہ لڑکی اور لڑکا آپس میں شادی کرچکے ہیں۔ یہ سارا معاملہ اس وقت منظر عام پر آیا جب لڑکی لڑکے کے ساتھ نازیبا سلوک کی ویڈیو سوشل میڈیا پر وائرل ہوئی ۔وزیراعظم عمران خان نے اسلام آباد میں پیش آنے والے واقعے کا نوٹس لیتے ہوئے آئی جی اسلام آباد سے رابطہ کیا تھا اور انہیں ملوث افراد کو ہر صورت کیفرکردار تک پہنچانے کی ہدایت کی تھی۔ وزیراعظم نے آئی جی اسلام آباد کو ہدایت کی کہ اس واقعے کو ٹیسٹ کیس کے طور پر لیا جائے اور ملوث افراد کو  قرار واقع سزا دی جائیں۔

یہ بھی  پڑھیں:  حارث رؤف کا بگ بیش میں وکٹ لینے کے بعد نیا ’’کورونا پروف‘‘ انداز۔۔ویڈیو دیکھیں