میجر شبیر شریف شہید کا 51 واں یوم شہادت آج منایا گیا
Stay tuned with 24 News HD Android App
(ویب ڈیسک) حویلی لکھا کے سرحدی علاقے سلیمانکی سیکٹر میں1971ء کی پاک بھارت جنگ میں پاکستان کے ازلی دشمن بھارت کو ناکوں چنے چبوانے والے پاکستان کے عظیم سپوت میجر شبیر شریف شہید کا آج 51 واں یوم شہادت آج منایا گیا۔ جنرل آفیسر کمانڈنگ ملک عامر محمد خان نے شہید کی قبر پر پھول چڑھائے۔ مختلف شعبہ ہائے زندگی سے تعلق رکھنے والے لوگوں نے قبر پر حاضری دی۔
میجر شبیر شریف شہید 28 اپریل 1943ء کو پنجاب کے ضلع گجرات میں پیدا ہوئے، 19 اپریل 1964ء کو پاک فوج میں کمیشن حاصل کیا، 3 دسمبر 1971ء کو میجر شبیر شریف شہید سلیمانکی سیکٹر میں فرنٹیئر فورس رجمنٹ کی ایک کمپنی کی کمانڈ کر رہے تھے، ان کو ایک اونچے بند پر قبضہ کرنے کی مہم سونپی گئی جہاں سے دو گاؤں گورمکھ کھڑا اور بیری والا زد میں آ سکتے تھے۔
View this post on Instagram
میجر شبیر شریف شہید کو اس پوزیشن تک پہنچنے کیلئے پہلے دشمن کی بارودی سرنگوں کے علاقے سے گزرنا تھا اور پھر 100 فٹ چوڑی اور 18 فٹ گہری ایک دفاعی نہر ثبونہ کو تیر کر عبور کرنا تھا، دشمن کی شدید گولہ باری کے باوجود مشکل مرحلہ طے کیا اور اپنی کمپنی کی قیادت کرتے ہوئے دشمن پر سامنے سے ٹوٹ پڑے۔
3 دسمبر کی شام تک اس کی قلعہ بندیوں سے باہر نکال دیا، گھمسان کے اس معرکے میں دشمن کے 43 سپاہی مار دیے اور 28 کو قیدی بنا لیا گیا، متعدد ٹینکوں کو بھی تباہ کر دیا، بھارتی فوج کے کمانڈر میجر نارائن کو ہلاک کرکے اس کے قبضے سے قیمتی دستاویزات حاصل کرلیں۔
6 دسمبر کی دوپہر کو دشمن کے ایک اور حملے کا دفاع کرتے ہوئے میجر شبیر شریف شہید اپنے توپچی کی اینٹی آئرکرفٹ گن سے دشمن کے ٹینکوں پر گولہ باری کر رہے تھے کہ دشمن کے ٹینک کا ایک گولہ انہیں آ لگا اور وہ شہید ہوگئے۔
دشمن کا مردانہ وار مقابلہ کرنے پر حکومت پاکستان کی جانب سے میجر شبیر شریف شہید کو نشان حیدر سے نوازا گیا۔
میجر شبیر شریف شہید واحد فوجی افسر ہیں جن کو نشان جرات اور نشان حیدر دونوں عطاء کیے گئے۔