ریاست مخالف بیانات؛ فلک جاوید کے جسمانی ریمانڈ میں مزید 4 دن کی توسیع
Stay tuned with 24 News HD Android App
(24نیوز)لاہور کی مقامی عدالت نے ریاست مخالف بیانات اورصوبائی وزیر کی نامناسب تصویر اپلوڈ کرنے کے مقدمے میں پی ٹی آئی کی رہنما فلک جاوید کے مزید جسمانی ریمانڈ پر محفوظ فیصلہ سنا دیا اور ملزمہ کےجسمانی ریمانڈ میں مزید 4دن کی توسیع کردی۔
تفصیلات کے مطابق متنازع ٹویٹ اور صوبائی وزیر کی نامناسب تصویر اپلوڈ کرنے کے مقدمے کی سماعت ہوئی،گرفتار پاکستان تحریک انصاف (پی ٹی آئی) کی رہنما فلک جاوید کو 4 روزہ جسمانی ریمانڈ مکمل ہونے پر عدالت میں پیش کیا گیا۔
سماعت کے دوران نیشنل سائبر کرائم انویسٹی گیشن ایجنسی (این سی سی آئی اے) نے فلک جاوید کے مزید جسمانی ریمانڈ کی استدعا کی تاہم ملزمہ کے وکیل نے درخواست کی مخالفت کرتے ہوئے مؤقف اختیار کیا کہ اب تک 9 روزہ ریمانڈ کے باوجود کوئی پیش رفت سامنے نہیں آئی۔
فلک جاوید کے وکیل نے کہا کہ ایف آئی آر جھوٹ پر مبنی ہے اور محض سیاسی بنیادوں پر درج کی گئی ہے، ملزمہ کو اس کی بہن صنم جاوید کی وجہ سے گرفتار کیا گیا۔
وکیل نے الزام لگایا کہ اگرچہ این سی سی آئی اے نے موبائل ریکور کرنے کا کہا مگر اب تک اس مقصد کے لیے ملزمہ کو کہیں نہیں لے جایا گیا،وکیلِ صفائی نے عدالت سے استدعا کی کہ مزید جسمانی ریمانڈ کی بجائے ملزمہ کو جوڈیشل ریمانڈ پر جیل بھیج دیا جائے تاہم عدالت نے دلائل سننے کے بعد فیصلہ محفوظ کر لیا۔
بعد ازاں عدالت نے محفوظ فیصلہ سناتے ہوئے فلک جاوید کے جسمانی ریمانڈ میں مزید 4دن کی توسیع کردی۔