کویت نے نئے سال کی تعطیلات کا اعلان کردیا

 (ویب ڈیسک)کویت نے نئے سال کی تعطیلات کا اعلان کردیا۔
کویت میں سول سروس بیورو کی جانب سے اعلان کیا گیا ہے کہ جمعرات یکم جنوری 2026 سے نئے سال کی تعطیلات کے موقع پر تمام وزارتوں، سرکاری اداروں، عوامی اداروں اور اداروں میں کام معطل رہے گا،سرکاری اوقات کار اتوار 4 جنوری 2026 کو دوبارہ شروع ہوں گے، تاہم خصوصی آپریشنل ضروریات کے حامل ادارے اور ایجنسیاں اپنی تعطیلات کے شیڈول کا تعین متعلقہ مجاز حکام کے ذریعے مفاد عامہ کے تحفظات کے مطابق کریں گی۔
دوسری جانب کویت کی وزارت داخلہ نے ملک میں غیر ملکی افراد کی رہائش اور وزٹ ویزا سے متعلق نئے ضوابط کا اعلان کیا ہے،کویتی وزارت داخلہ نے ملک میں داخلے، رہائش اور وزٹ ویزا سے متعلق نئے ضوابط متعارف کراتے ہوئے غیر ملکیوں کی رہائش کے حوالے سے نئے انتظامی ضوابط کے تحت داخلے اور وزٹ ویزوں کی ماہانہ فیس 10 کویتی دینار مقرر کردی ہے اور اس کا نفاذ 23 دسمبر 2025 سے ہوچکا ہے۔
سماجی رابطوں کی ویب سائٹ ایکس پر جاری بیان میں کویتی وزارت داخلہ کا کہنا ہے کہ قانون نمبر 116/2013 کے تحت ملک میں آنے والے غیر ملکی سرمایہ کاروں کے لیے داخلہ اور رہائشی ویزے کویت کی براہ راست سرمایہ کاری پروموشن اتھارٹی (KDIPA) کی درخواست پر جاری کیے جاتے ہیں۔
قواعد و ضوابط کے تحت اہل غیر ملکی سرمایہ کاروں کے لیے عام رہائشی اجازت نامے 15 سال تک کے لیے دیئے جا سکتے ہیں جو وزراء کونسل کے مقرر کردہ اصولوں کے مطابق ہیں، اس طرح کے اجازت نامے KDIPA کی جانب سے ایک سرکاری درخواست کی بنیاد پر جاری کیے جاتے ہیں جس میں اس بات کی تصدیق ہوتی ہے کہ درخواست گزار مطلوبہ شرائط کو پورا کرتا ہے۔

یہ بھی پڑھیں:ایپل کا فولڈ ایبل آئی فون،لانچنگ کی متوقع تاریخ سامنے آگئی
ایگزیکٹو ریگولیشنز غیر ملکی شہریوں کی پیدائش کے اندراج کے لیے چار ماہ کی رعایتی مدت بھی متعارف کراتے ہیں، اس مدت کے بعد جرمانے عائد کیے جائیں گے، جو پہلے مہینے کے دوران 2 کویتی دینار یومیہ سے شروع ہوں گے اور اس کے بعد 4 کویتی دینار یومیہ تک بڑھ جائیں گے،اس قانون میں گھریلو ملازمین سے متعلق نئی دفعات کا بھی خاکہ پیش کیا گیا ہے۔
 ضوابط میں کہا گیا ہے کہ گھریلو ملازمین کی عمر کم از کم 21 سال اور 60 سال سے زیادہ نہیں ہونی چاہیے،داخلے کے اجازت نامے آجر کی درخواست پر اور جنرل ڈائریکٹوریٹ آف ریذیڈنسی اینڈ فارنرز افیئرز کے تعاون سے جاری کیے جاتے ہیں۔