حریم شاہ کی بلاول بھٹو کیلئے خصوصی ویڈیو وائرل

(24نیوز)ٹک ٹاک اسٹار حریم شاہ یوں تو اپنی ویڈیوز اور متنازع بیانات کی وجہ سے پہچانی جاتی ہیں، تاہم آج کل وہ پاکستان پیپلز پارٹی (پی پی پی) کے چیئرمین بلاول بھٹو کے لیے رومانوی گیت جاری کرنے کی وجہ سے خبروں میں ہیں۔

سیاستدانوں اور معروف شخصیات کی ویڈیوز لیک کرکے الگ شہرت بنانے والی حریم شاہ نے دو دن قبل انسٹاگرام پر بلاول بھٹو زرداری کے لیے ایک خصوصی ویڈیو شیئر کی، جو دیکھتے ہی دیکھتے وائرل ہوگئی۔حریم شاہ نے حال ہی میں گلوکار علی ظفر کی جانب سے مایہ ناز کوہ پیما علی محمد سدپارہ کی یاد میں جاری کیے گئے گانے ’تم چلے آؤ پہاڑوں کی قسم‘ کو بلاول بھٹو زرداری کے لیے شیئر کیا۔

ٹک ٹاک اسٹار کی جانب سے شیئر کی گئی ویڈیو میں انہیں موبائل فون پر بلاول بھٹو زرداری کی تصویر کو گلے سے لگاتے ہوئے دیکھا جا سکتا ہے۔ویڈیو میں حریم شاہ جہاں بلاول بھٹو زرداری کی موبائل میں موجود تصویر کو گلے لگاتی دکھائی دیں، وہیں وہ رومانوی گیت پر رقص بھی کرتی دکھائی دیں۔

ٹک ٹاک اسٹار کی جانب سے ویڈیو شیئر کیے جانے کے بعد ویڈیو وائرل ہوگئی اور مداحوں نے ان کی بلاول بھٹو زرداری سے محبت کو سراہا۔ حریم شاہ نے مذکورہ ویڈیو کو شیئر کرتے ہوئے اس کے کمنٹس کو بلا کردیا، تاکہ شائقین نامناسب کمنٹس نہ کر سکیں، تاہم سوشل میڈیا صارفین ان کی مذکورہ ویڈیو کو شیئر کرکے ان کی تعریفیں کرتے دکھائی دیے۔بلاول بھٹو کے لیے ویڈیو جاری کرنے سے قبل حال ہی میں حریم شاہ کی پہلی ویب سیریز کا ٹریلر جاری ہوا تھا، جسے کافی سراہا گیا۔