مشرقِ وسطیٰ میں کشیدگی کے اثرات، عالمی منڈی میں تیل کی قیمتوں میں اضافہ ہوگیا

(24نیوز)امریکہ اور ایران کے درمیان ایک بار پھر بڑھتی ہوئی کشیدگی کے اثرات عالمی توانائی منڈیوں پر نمایاں ہونا شروع ہو گئے ہیں، جس کے باعث خام تیل کی قیمتوں میں اضافہ ریکارڈ کیا گیا ہے۔

بین الاقوامی مارکیٹ میں برینٹ کروڈ آئل کی قیمت 1.54 فیصد اضافے کے بعد 95 ڈالر فی بیرل تک پہنچ گئی ہے،اسی طرح امریکی ویسٹ ٹیکساس انٹرمیڈیٹ (WTI) خام تیل کی قیمت بھی 1.81 فیصد اضافے کے ساتھ 92 ڈالر فی بیرل پر ٹریڈ کر رہی ہے۔

اماراتی مربن آئل کی قیمت میں بھی اضافہ دیکھا گیا ہے، جو 1.98 فیصد بڑھ کر 90 ڈالر فی بیرل کی سطح پر پہنچ گیا ہے۔

ماہرین کے مطابق مشرقِ وسطیٰ میں جغرافیائی سیاسی کشیدگی بڑھنے سے توانائی کی سپلائی سے متعلق خدشات پیدا ہو جاتے ہیں، جس کے نتیجے میں عالمی سرمایہ کار محفوظ اثاثوں کی طرف رجحان کرتے ہیں اور تیل کی قیمتوں میں اتار چڑھاؤ دیکھنے میں آتا ہے۔

یہ بھی پڑھیں:ملک بھر میں موسم کا نیا رخ، بارشوں کی پیشگوئی، بالائی علاقوں میں سیلابی صورتحال کا خدشہ

تجزیہ کاروں کا کہنا ہے کہ اگر صورتحال مزید کشیدہ ہوتی ہے تو آئندہ دنوں میں تیل کی قیمتوں میں مزید اضافہ بھی ممکن ہے، جبکہ عالمی معیشت پہلے ہی مہنگائی کے دباؤ کا سامنا کر رہی ہے۔