بادشاہ چارلس کی تاج پوشی: تقریب میں کن ممالک کو دعوت نہیں دی گئی؟

(ویب ڈیسک) برطانیہ کے شاہ چارلس سوم کی تاج پوشی کی تقریب میں کئی ممالک کو شرکت کی دعوت نہیں دی گئی۔

   بین الاقوامی خبررساں ادارے کے مطابق برطانوی بادشاہ چارلس کی تاج پوشی کی تقریب 6 مئی کو ویسٹ منسٹر ایبے میں ہوگی، تقریب میں روس، بیلاروس، ایران، میانمار، افغانستان، شام اور وینزویلا کو دعوت نہیں دی گئی ہے۔

تقریب میں شمالی کوریا، نکاراگوا کے سربراہان مملکت کے بجائے اعلیٰ سفارتکاروں کو بلایا گیا ہے جبکہ شاہ چارلس کی تاج پوشی کی تقریب میں دنیا کے 203 ممالک سے دو ہزار سے زائد مہمانوں کو مدعو کیا گیا ہے۔

تاج پوشی سے پہلے ہی لندن سیاحوں سے بھر گیا ہے، درجنوں غیر ملکی، شاہی خاندان، معززین اور سربراہان مملکت اس تقریب میں شرکت کے لیے برطانیہ پہنچیں گے۔

یہ بھی پڑھیے: بادشاہ چارلس کی تاج پوشی، لندن کی سڑک پر دیوہیکل تاج سجا دیا گیا

تقریب کی وجہ سے ویک اینڈ پر سینٹرل لندن کی متعدد سڑکیں بند ہوں گی، 1953 میں ملکہ الزبتھ دوم کی تاج پوشی کے بعد ملک میں یہ پہلا ایسا موقع ہے۔

6 مئی کو بادشاہ چارلس اور کمیلا محل سے سنہری بگھی میں ویسٹ منسٹر ایبے پہنچیں گے، جہاں انہیں ایک تقریب میں تاج پہنایا جائے گا۔

اس کے بعد یہ جوڑا محل میں واپس آئے گا، جس کے ساتھ ہزاروں رسمی فوجیوں پر مشتمل ایک شاندار فوجی جلوس بھی نکالا جائے گا، جس کے بعد وہ خیر خواہوں کا استقبال کرنے کیلئے محل کی بالکونی میں آئیں گے۔