2023 کا جوتا کلب ،کامران ٹیسٹوری پہلے ممبر بن گئے

کراچی(24 نیوز)نمائش چورنگی پر میڈیا بریفنگ کے دوران شہری نے گورنر سندھ اور خالد مقبول صدیقی کی طرف جوتا اچھال دیا۔

دوسری جانب گورنر سندھ کامران ٹیسوری اور ڈاکٹر فاروق ستار کے درمیان ملاقات ہوئی ہے۔ذرائع کے مطابق فاروق ستار کی رہائش گاہ پر ہونے والی ملاقات میں ایم کیو ایم دھڑوں کو یکجا کرنے، فاروق ستار کی واپسی سمیت دیگر امور پرگفتگو ہوئی۔ گورنرسندھ نے فاروق ستار کو مصطفیٰ کمال سے ہونےوالی ملاقات سے متعلق آگاہ کیا۔

فاروق ستار نے گورنر سندھ کامران ٹیسوری کو تعاون کی یقین دہانی کرائی۔ بعد ازاں میڈیا سے گفتگو میں گورنر سندھ کا کہنا تھاکہ کراچی کے شہریوں کے دل زخمی ہیں، مرہم رکھنے والا کوئی نہیں، یہاں آنے کا مقصد صرف لوگوں کو جوڑنا ہے۔

انہوں نے کہا کہ ہم سب کراچی کے راستوں کی طرح ٹوٹ چکے ہیں، ہم نے اپنی غلطیوں سے اپنی طاقت کو کھو دیا ہے، ہمیں خود اپنا حق حاصل کرنا ہوگا کوئی مسیحا نہیں آئے گا، بیروزگاری اتنی بڑھ چکی اب 10 ہزار میں بھی ملازمت نہیں مل رہی، کراچی میں بجلی نہیں،پانی صرف ٹینکر میں ہے۔

ان کا کہنا تھاکہ کراچی کی بجلی، پانی، گیس مافیا کے قبضے میں ہے، کراچی والوں سے مجرموں والا سلوک ہورہا ہے، کراچی کے لوگ ظلم سہہ کرخاموش ہیں۔