عالمی مارکیٹ میں سونے کی قیمتوں میں پھر اضافہ

(ویب ڈیسک )عالمی مارکیٹ میں سونے کی قیمت میں جمعہ کو معمولی اضافہ ریکارڈ کیا گیا، جس کے بعد قیمتی دھات مسلسل تیسرے ہفتے بھی اضافے کی جانب گامزن ہے۔

خبر رساں ادارے رائٹرز کے مطابق اسپاٹ گولڈ کی قیمت 0.5 فیصد اضافے کے بعد 4,540.18 ڈالر فی اونس ہوگئی، جبکہ امریکی گولڈ فیوچرز کی قیمت 0.6 فیصد اضافے کے ساتھ 4,596.60 ڈالر فی اونس تک پہنچ گئی۔

رپورٹ کے مطابق رواں ہفتے اب تک سونے کی قیمت میں 3.6 فیصد اضافہ ہوچکا ہے، جبکہ گزشتہ روز سونے کی قیمت جون کے اوائل کے بعد بلند ترین سطح پر پہنچ گئی تھی۔

ماہرین کے مطابق ڈالر کی کمزوری اور امریکی بانڈ مارکیٹ میں تبدیلیاں سونے کی قیمت میں اضافے کی اہم وجوہات میں شامل ہیں۔ کمزور ڈالر کے باعث دیگر کرنسیوں میں خریداری کرنے والے سرمایہ کاروں کے لیے ڈالر میں قیمت رکھنے والا سونا نسبتاً سستا ہوجاتا ہے۔

 یہ بھی  پڑھیں:تیل کی قیمتوں نے تمام ریکارڈ توڑ دئیے!

امریکی محکمہ خزانہ کی جانب سے طویل مدتی امریکی ٹریژری سیکیورٹیز کی بائی بیکس کا حجم بڑھانے کے اعلان نے بھی مارکیٹ میں اثرات مرتب کیے ہیں۔ امریکی وزیر خزانہ اسکاٹ بیسنٹ نے مزید ٹریژری بانڈز واپس خریدنے کا امکان ظاہر کیا ہے۔

دوسری جانب امریکی فیڈرل ریزرو کے آئندہ فیصلوں اور شرح سود سے متعلق توقعات کو بھی سونے کی مستقبل کی سمت کے لیے اہم قرار دیا جارہا ہے۔ عام طور پر بلند شرح سود سونے کی کشش کو کم کرتی ہے کیونکہ سونا کوئی باقاعدہ منافع یا سود ادا نہیں کرتا۔

عالمی سطح پر جغرافیائی کشیدگی بھی سونے کی قیمتوں پر اثرانداز ہورہی ہے، امریکی وزیر خزانہ نے ایران کے خلاف ’’تاریخ کی سخت ترین پابندیاں‘‘ عائد کرنے کا اعلان کیا ہے۔

ادھر دیگر قیمتی دھاتوں کی قیمتوں میں بھی اضافہ ہوا۔ چاندی 1.3 فیصد اضافے کے بعد 68.92 ڈالر، پلاٹینم 2.4 فیصد اضافے کے بعد 1,872.64 ڈالر جبکہ پیلاڈیم 1.3 فیصد اضافے کے بعد 1,351.28 ڈالر فی اونس ہوگیا۔