سوڈان: عسکری گروہوں کے مابین جھڑپوں کا سلسلہ جاری، 200 سے زائد ہلاکتیں
Stay tuned with 24 News HD Android App
(24 نیوز) بین الاقوامی خبررساں ادارے ’اے ایف پی‘ کے مطابق سوڈان میں فوج اور نیم فوجی دستوں کے درمیان لڑائی میں 200 کے قریب افراد ہلاک اور ایک ہزار 8 سو افراد زخمی ہوچکے ہیں، 3 روز سے جاری جنگ کے نتیجے میں ہسپتالوں کو شدید نقصان پہنچا اور طبی سامان اور خوراک کی کمی ہوگئی۔
اقوام متحدہ نے اس علاقے میں فوری جنگ بندی کا مطالبہ کیا ہے اور یورپی یونین سمیت بین الاقوامی اداروں نے بھی اس حوالے سے شدید تشویش کا اظہار کیا ہے۔
2021ء میں بغاوت کے بعد فوجی حکومت قائم کرنے والے 2 جرنیلوں کی افواج کے درمیان ایک ہفتے سے جاری اقتدار کی کشمکش ہفتے کو پرتشدد کارروائیوں میں تبدیل ہوگئی، یہ تنازع سوڈان کے آرمی چیف عبدالفتاح البرہان اور نیم فوجی دستے ریپڈ سپورٹ فورسز کی کمانڈ کرنے والے محمد ہمدان داگلو کے درمیان ہے۔
Fears of regional spillover grow as UN says nearly 200 dead, 1,800 wounded in battles across Sudan.https://t.co/sdOQnayPpC pic.twitter.com/o02DNokUhO
— AFP News Agency (@AFP) April 17, 2023
خرطوم میں دونوں فورسز کے درمیان لڑائی اس وقت شروع ہوئی جب آر ایس ایف کو فوج میں شامل کرنے کے منصوبے پر برہان اور دیگلو کے درمیان اختلافات ہوئے۔
سوڈان میں اقوام متحدہ کے مشن کے سربراہ وولکر پرتھیس نے سلامتی کونسل کو اجلاس میں بتایا کہ اس تنازع کے دوران کم از کم 185 افراد ہلاک اور 18 سو افراد زخمی ہوچکے ہیں۔
انہوں نے اجلاس کے بعد صحافیوں کو بتایا کہ ’یہ ایک بہت ہی پیچیدہ صورت حال ہے اس لیے یہ کہنا بہت مشکل ہے کہ معاملے کس کروٹ بیٹھے گا‘۔
قبل ازیں اقوام متحدہ کے سیکریٹری جنرل انتونیو گوتریس نے دونوں فریقین سے ایک بار پھر فوری طور پر دشمنی ختم کرنے کا مطالبہ کرتے ہوئے خبردار کیا کہ مزید کشیدگی ملک اور خطے کیلئے تباہ کن ہوسکتی ہے۔
VIDEO: AFP's avatar
— AFP News Agency (@AFP) April 17, 2023
AFP News Agency @AFP
Streets are nearly deserted after days of fighting in Khartoum, Sudan pic.twitter.com/aczrNvKVXx
سوڈان میں طبی ماہرین نے دونوں طرف سے تقریباً 100 شہریوں اور درجنوں جنگجوؤں کی ہلاکتوں کی تصدیق کی ہے لیکن ہلاکتوں کی تعداد اس سے کہیں زیادہ بتائی جارہی ہے کیونکہ بہت سے زخمی ہسپتالوں تک پہنچنے سے قاصر ہیں۔
سرکاری ڈاکٹروں کی یونین نے خبردار کیا کہ اس لڑائی نے خرطوم اور دیگر شہروں کے متعدد ہسپتالوں کو بھاری نقصان پہنچایا ہے، جن میں سے کچھ مکمل طور پر غیرفعال ہوچکے ہیں۔
عالمی ادارہ صحت کی جانب سے پہلے ہی متنبہ کیا جاچکا ہے کہ خرطوم کے 9 ہسپتالوں میں کئی زخمی شہریوں کو علاج کو لایا جارہا ہے لیکن وہاں اہم طبی آلات سمیت دیگر ضروری سامان ختم ہو چکا ہے۔
دارفور کے مغربی علاقے میں عالمی طبی امدادی تنظیم ’ڈاکٹرز وِدآؤٹ بارڈرز‘ نے اطلاع دی ہے کہ شمالی دارفور ریاست میں واقع واحد ہسپتال میں 136 زخمی مریض داخل کروائے جا چکے ہیں۔