چینی ٹیکنالوجی کا خوف،امریکہ نے معروف کمپنی کی الیکٹرک گاڑیوں کی فروخت پر پابندی لگا دی

(ویب ڈیسک )الیکٹرک گاڑیاں بنانے والی کمپنی پول اسٹار (Polestar) کو امریکہ میں بڑا دھچکا لگا ہے، جس کے بعد کمپنی کے مالکان اور ڈیلرز میں اپنی گاڑیوں کے مستقبل اور سروس نیٹ ورک کے حوالے سے تشویش بڑھ گئی ہے۔

غیر ملکی خبر رساں ادارے  کے مطابق امریکی حکام نے پول اسٹار کو 2027 ماڈلز کی فروخت کے لیے اجازت دینے سے انکار کر دیا ہے  کیونکہ کمپنی کی کچھ گاڑیوں میں چینی ٹیکنالوجی سے منسلک کنیکٹڈ وہیکل سسٹمز استعمال ہوتے ہیں، جنہیں سیکیورٹی خدشات کے باعث محدود کیا جا رہا ہے۔

اس فیصلے کے بعد پول اسٹار کے موجودہ اور ممکنہ صارفین میں یہ سوال شدت اختیار کر گیا ہے کہ مستقبل میں ان کی گاڑیوں کی وارنٹی، سافٹ ویئر اپڈیٹس اور مرمت کی سہولت کس حد تک دستیاب رہے گی۔

 یہ بھی پڑھیں:ایپل کا بھارت پر سنگین الزام!

کمپنی نے وضاحت کی ہے کہ 2027 سے پہلے کے ماڈلز کی فروخت اور سروس معمول کے مطابق جاری رہے گی، اور صارفین کو موجودہ نیٹ ورک کے ذریعے سپورٹ فراہم کی جائے گی۔ تاہم کچھ صارفین اب بھی مستقبل کے بارے میں غیر یقینی کا شکار ہیں۔

دوسری جانب ڈیلرز کا کہنا ہے کہ اس فیصلے نے ان کے کاروباری منصوبوں کو متاثر کیا ہے، کیونکہ وہ نئی الیکٹرک گاڑیوں کی توقع کے ساتھ سرمایہ کاری کر چکے تھے، لیکن اب انہیں زیادہ تر استعمال شدہ گاڑیوں اور سروس پر انحصار کرنا پڑے گا۔

ماہرین کے مطابق یہ صورتحال امریکی آٹو انڈسٹری میں کنیکٹڈ گاڑیوں اور سیکیورٹی پالیسیوں کے بڑھتے ہوئے اثرات کو ظاہر کرتی ہے، جس سے آنے والے برسوں میں مزید کمپنیوں کو بھی چیلنجز کا سامنا ہو سکتا ہے۔